काठमाडौँ । बहराइनबाट स्वदेश फर्किन चाहने नेपालीलाई त्यहाँको दूताबासले सहजीकरण गर्ने भएको छ ।
बहराइनबाट देवनारायण पोखरेलले दिनुभएको जानकारीअनुसार खाडी क्षेत्रका सबै दूताबासको हालै सम्पन्न भर्चुअल बैठकले सो निर्णय गरेको हो ।
‘खाडी क्षेत्रका दूताबासको पहलकदमीका सूचना आदानप्रदान गर्न भर्चुअल ग्रुप बनाइएको छ’ उहाँले युगदर्शनसित भन्नुभयो– ‘त्यो बैठकमा म पनि सहभागी थिएँ । बहराइनबाट कोही नेपाली स्वदेश फर्किन चाहेको खण्डमा साउदी अरबियास्थित नेपाली दूताबासमार्फत दमाम एयरपोर्ट हुँदै नेपाल आउन सहजीकरण गर्ने सल्लाह भएको छ ।’
बहराइन नेपाली एकता समाजका महासचिवसमेत रहनुभएका पोखरेलका अनुसार बहराइनमा अहिलेसम्म नेपालीहरू सङ्कटमा परेको खासै रिपोर्ट प्राप्त भएको छैन ।’
‘पहिलापहिला इरानी मिसाइल वा ड्रोन आक्रमण तीव्र थियो, अहिले घटेको छ’ त्यहाँको ताजा अवस्थाबारे उहाँले भन्नुभयो– ‘फेरि पनि आक्रमण जारी नै छ । शनिबार मात्रै छओटा मिसाइल आक्रमण भएको थियो ।’
इरानी आक्रमणले गर्दा त्यहाँका होटेल तथा अन्य उद्योगमा असर परिरहेको बताइएको छ । उहाँले युद्धको अवस्था लम्बिएमा समस्या पनि बढ्न सक्ने र त्यसको प्रभाव नेपालीमा पनि पर्ने उहाँको अनुमान थियो ।
बहराइनका सरकारले युद्धको बारेमा भ्रामक सूचना नफैलाउन आग्रह गरिरहेको उहाँले जानकारी दिनुभयो ।
पोखरेलका अनुसार बहराइन सरकारले भिसाअवधि सकिएका नेपालीको हकमा एक महिना स्वत: अवधि थप्ने व्यवस्था मिलाएको छ ।
