भरतपुर । चितवनको माडी नगरपालिकाले पालिकाभित्र रहेको भूमि वर्गीकरण गरेको छ । स्थानीय भूउपयोग परिषद् माडीले यहाँको भूमिलाई सात भागमा वर्गीकरण गरेको हो ।
नगरपालिकाले भू उपयोग ऐन–२०७६ र नियमावली–२०७९ अनुसार जमीनको वर्गीकरण गरेको छ । नगरपालिकाका प्रमुख प्रशासकीय अधिकृत जगत्प्रसाद भुसालका अनुसार यहाँ सबैभन्दा धेरै जङ्गल रहेको छ । नगरपालिकामा २१ हजार आठ सय २४ दशमलब ४४ हेक्टर रहेकोमा १२ हजार नौ सय ७५ दशमलब ७५ हेक्टर जङ्गलले ओगटेको छ ।
त्यस्तै छ हजार पाँच सय ३५ दशमलब सात हेक्टर कृषियोग्य रहेको छ । उहाँका अनुसार सार्वजनिक भूमि तीन सय १५ दशमलब ५२ हेक्टर, आवासीय जमिन एक हजार नौ सय १८ दशमलब ८७ हेक्टर, व्यावसायिक जमिन ५९ दशमलव ९३ हेक्टर, औद्योगिक क्षेत्र १० दशमलब दुई हेक्टर र सांस्कृतिक भूमि नौ दशमलब ३१ हेक्टर रहेको छ ।
भूमि वर्गीकरणको काम सकिएकाले सबै विवरण वडा कार्यालयमा पठाइएको उनले जानकारी दिए ।
पालिकाले गरेको भूमि वर्गीकरणबारे चित्त नबुझे आगामी चैत १ गतेसम्ममा भू उपयोग कार्यान्वयन निर्देशिका २०८१–को दफा २८ को उपदफा २ बमोजिम निवेदन पेस गर्न सूचना जारी गरिएको छ । जग्गाधनीले भू उपयोग वर्गीकरणमा चित्त नबुझाएर निवेदन दिएमा यस्ता निवेदनमाथि अध्ययन गरी पुनर्विचार गरिने अधिकृत भुसालले बताउनुभयो । (रासस)
