केरसिंह अदै, तौलिहवा ।
राष्ट्रिय जनमोर्चाका कपिलवस्तुका नेता मुक्तिराम न्यौपानेको स्मृतिमा शोकसभा सम्पन्न भएको छ ।
अध्यक्ष चित्रबहादुर केसीको मुख्य उपस्थितिमा २०८२ फागुन २८ गते बाणगङ्गा ४ नम्बर जितपुरस्थित न्यौपानेको निवासमा सो कार्यक्रम सम्पन्न भएको हो ।
निधन भएको सातौँ दिन आयोजित सो कार्यक्रमको आयोजना नेकपा (मसाल) कपिलवस्तुले आयोजना गरेको थियो ।
कार्यक्रममा शोकमन्तव्य राख्दै अध्यक्ष केसीले स्मृतिशेष न्यौपानेप्रति श्रद्धाञ्जली व्यक्त गर्नुभयो ।
‘कमरेड न्यौपाने गत लामो समयदेखि प्रवास मूल प्रवाह अखिल भारत नेपाली एकता समाजमा रहेर काम गर्दै आउनुभएको र नेपालमा आएर पनि उहाँ राजमो जिल्ला उपाध्यक्ष, अखिल नेपाल किसान महासङ्घ (अप्फा) को जिल्ला अध्यक्ष पदमा रही पार्टीको जिम्मेवारी पूरा गर्नुभयो’ केसीले भन्नुभयो ।
‘मानिस जन्मेपछि मृत्यु हुनु अनिवार्य रहे पनि राष्ट्र, जनता र समाजप्रति उत्तरदायित्व वहन गर्नु महत्त्वपूर्ण विषय हो’ केसीले भन्नुभयो– ‘कमरेड न्यौपानेले त्यो काम पूरा गर्नुभयो । उहाँबाट अनुसरण गर्नुपर्ने विषय यो हो ।’
देशको समसामयिक राजनीतिमाथि प्रकाश पार्दै उहाँले नेपालमा अमेरिकी साम्राज्यवाद हावी हुँदै गएको प्रष्ट पार्नुभयो ।
जेएनजी आन्दोलनको प्रयोग, सिंहदरबार, सर्वोच्च अदालत, प्रहरीचौकी, देशभरका भौतिक संरचना ध्वस्त बनाएर २०८४ मा हुने चुनाव २०८२ मै गराएर आफूअनुकूल सरकार बनाउन अमेरिका असफल भएको उहाँको दाबी थियो ।
मसालको कपिलवस्तु जिल्ला प्रवक्ता माधव भाटक्षेत्रीको सञ्चालन तथा राजमो कपिलवस्तुका जिल्ला अध्यक्ष रामप्रसाद बेल्बासेको अध्यक्षतमा उक्त कार्यक्रम अगाडि बढेको थियो ।
न्यौपाने गत फागुन २२ गते राति १० बजे उपचारको क्रममा निधन भएको थियो । उहाँको परिवारमा दुई छोरा र एक छोरी छन् । श्रीमतीको यसअघि नै निधन भइसकेको थियो ।
