काठमाडौँ । अखिल नेपाल महिला सङ्घले सुर्खेतकी इनिसा विकको बलात्कारपछि हत्या प्रकरणमा कडाभन्दा कडा कारबाही गर्न माग गरेको छ ।
अध्यक्ष मीना पुनको हस्ताक्षरमा २०८२ फागुन २९ गते बिहीबार प्रेसवक्तव्य जारी गर्दै महिला सङ्घले यस्तो माग गरेको हो ।
इनिसा प्रकरणले महिला हिंसा र दण्डहीनताको अवस्था अहिलेको विद्यमान रहेको बताउँदै वक्तव्यमा यस्ता आपराधिक घटना दोहोरिन नदिनका लागि बालिका तथा महिलाको सुरक्षा हेतु प्रभावकारी नीति बनाउनसमेत मागि गरिएको छ ।
यस्तो छ, प्रेसवक्तव्यको पूर्ण पाठ :
“सुर्खेत वीरेन्द्रनगरमा बस्दै आएकी १६ वर्षीया इनिसा विकलाई बलात्कारपछि हत्या गरिएको जघन्य घटनाप्रति हाम्रो गम्भीर ध्यानाकर्षण भएको छ ।
यस प्रकारको बर्बर घटनाले सिङ्गो नेपाली समाजलाई स्तब्ध बनाएको छ । महिलाको सुरक्षा र कानुनी शासनको धज्जी उडाएको छ । यस प्रकारका निन्दनीय घटनाले महिलामाथिको हिंसा र दण्डहीनताको स्थिति अहिले पनि विद्यमान छ भन्ने कुरालाई छर्लङ्ग पारेको छ ।
हामीले यस घटनाको छिटोभन्दा छिटो पारदर्शी र निष्पक्ष रूपमा छानबिन गरी अपराधीलाई कडाभन्दा कडा सजाय दिन जोडदार माग गर्दछौँ र पीडित परिवारलाई उचित क्षतिपूर्ति दिलाउन पनि माग गर्दछौँ साथै त्यस प्रकारका आपराधिक घटना दोहोरिन नदिन र बालिका तथा महिलाको सुरक्षाको लागि प्रभावकारी नीति बनाउन सामाजिक अनुसन्धानलाई प्राथमिकतामा राखेर अघि बढ्न आवश्यक छ भने भएका कानुनलाई कडाइपूर्वक कार्यान्वयन गर्न तदारुकताका साथ अगाडि बढ्नुपर्ने आवश्यकता छ ।”
