गोपालप्रसाद भट्टराई, सन्धिखर्क ।
एक सय सोह्रौँ अन्तर्राष्ट्रिय श्रमिक नारी दिवसको अवसरमा अखिल नेपाल महिला सङ्घ अर्घाखाँचीले कार्यक्रम सम्पन्न गरेको छ ।
सन्धिखर्कमा २०८२ फागुन २४ गते आयोजना गरिएको सो कार्यक्रममा बोल्दै वक्ताहरूले महिलाको अधिकार, समानता र सशक्तीकरणका लागि अझै पनि सङ्घर्षको खाँचो औल्याएका छन् ।
अन्तर्राष्ट्रिय नारी दिवसले महिलाको हक, अधिकार र सम्मानका लागि भएका ऐतिहासिक सङ्घर्षको स्मरण गर्दै वक्ताहरूले समाजमा विद्यमान महिला हिंसा, विभेद र असमानताको अन्त्य गर्न राज्य र समाज दुवै जिम्मेवार हुनुपर्नेमा जोड दिए ।
महिला सङ्घकी केन्द्रीय उपाध्यक्ष कल्पना पोख्रेल, राष्ट्रिय जनमोर्चा अर्घाखाँचीका अध्यक्ष थम्मन केसी, राजमो नेता पशुपतिनाथ ढकाललगायतले बोल्दै यस्तो बताउनुभएको हो ।
संविधानमा महिला अधिकारका धेरै व्यवस्था उल्लेख भएपनि व्यवहारमा फितलो हुँदा अझै पनि समस्या रहेको उनीहरूको भनाइ छ ।
शिक्षा, स्वास्थ्य, रोजगारी तथा राजनीतिक क्षेत्रमा समेत महिलाको सहभागिता र नेतृत्व अझै बढाउनुपर्नेमा उनीहरूको जोड छ ।
महिलालाई आत्मनिर्भर र सशक्त बनाउनेतर्फ विशेष ध्यान दिनुपर्ने धारणा वक्ताले व्यक्त गरेका छन् ।
गीता ढकालको अध्यक्षता, रिता बन्जाडेको स्वागत मन्तव्य र उषा पुनको सञ्चालनमा सम्पन्न कार्यक्रममा राजमो अर्घाखाँचीका नेता शेरबहादुर बिसीसहितका नेता र विभिन्न तहका महिला नेतृको सहभागिता रहेको थियो ।
