काठमाडौँ । बागलुङ निर्वाचन क्षेत्र नं. १ मा अझैसम्म मतगणना हुन सकेको छैन ।

वडाअनुसार मतगणना गर्ने विषयमा विवाद भएपछि सो जिल्लामा मतगणना हुन नसकेको हो ।

राष्ट्रिय जनमोर्चा बागलुङका अध्यक्ष तिलक थापाका अनुसार राजमोले वडाअनुसार मतगणना गर्ने माग राखेको छ ।

‘हामीले वडाअनुसार मतगणना हुनुपर्दछ भनिरहेका छौँ तर प्रशासनले मारिहेको छैन’ थापाले युगदर्शनसित भन्नुभयो ।

बागलुङ–२ र छिमेकी जिल्ला पर्वतमा वडाअनुसार गणना हुँदा बागलुङ–१ मा किन त्यसो गर्न नमिल्ने भनेर आफूहरूले प्रश्न राखेको थापाले जानकारी दिनुभयो ।

बिहान ८ बजेको सर्वदलीय बैठक सोही विषयमा विवाद भएको थियो । अहिले फेरि सर्वदलीय बैठक बसिरहेको छ ।

मतगणनाको उपर्युक्त विवाद समाधानपछि नै गणना सुरु हुने बताइएको छ ।

सर्वदलीय बैठकमा राजमोको तर्फबाट राजमो बागलुङका नेता थानेश्वर सुवेदीको सहभागिता रहेको छ ।