काठमाडौँ । राष्ट्रिय जनमोर्चाका मधेस प्रदेशदेखि कर्णाली प्रदेशसम्मका उम्मेदवारले मतदान गर्नुभएको छ ।
२०८२ फागुन २१ गते बिहीबार मधेसका रौतहट, बारा, हिमाली जिल्ला ओखलढुङ्गा र कर्णाली प्रदेशका कालीकोटका राजमो उम्मेदवारले मतदान गर्नुभएको हो ।
रौतहट निर्वाचन क्षेत्र नं. २ बाट राजमो उम्मेदवार नेक मोहम्मद देवान फकिरले मतदान गर्नुभएको छ । जिल्लाको राजपुर नगरपालिका वडा नं. ८ को मदरसामा कायम गरिएको मतदान केन्द्रमा पुगी उहाँले मतदान गर्नुभएको हो ।
बाराको क्षेत्र नं. ३ बाट राजमो उम्मेदवार बालकृष्ण शर्माले जितपुर–सिमरा उपमहानगरपालिकाको वडा नं. १० कञ्चनपुरमा पुगी मतदान गर्नुभएको छ । वडास्थित नेपाल राष्ट्रिय आधारभूत विद्यालयमा स्थापना गरिएको मतदान केन्द्रमा पुगेर शर्माले मतदान गर्नुभएको हो ।
हिमाली जिल्ला ओखलढुङ्गाका राजमो उम्मेदवार शेरबहादुर खत्रीले पनि मतदान गर्नुभएको छ । सिद्धिचरण नगरपालिका–३ नारायणस्थानको नारायस्थान माविमा कायम गरिएको मतदान केन्द्रबाट उहाँले मतदान गर्नुभएको हो । मतदानपछि उहाँ सोही पालिकाको वडा नं. ६ सल्लेरीमा निर्वाचन अनुगमन गरिरहेको युगदर्शनलाई जानकारी दिनुभयो ।
कर्णाली प्रदेशको कालीकोटबाट राजमो उम्मेदवार अजय गिरीले खाडाचक्र नगरपालिका–११ मा पुगी मतदान गर्नुभयो । वडाको बदालकोटस्थित चुलीमालिका माविमा कायम गरिएको मतदान केन्द्रबाट गिरीले मतदान गर्नुभएको हो ।
