काठमाडौँ । राष्ट्रिय जनमोर्चाले खाडी मुलुकमा रहेका नेपालीको तत्काल उद्धारमा विशेष जोड दिएको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८२ फागुन २० गते प्रेसवक्तव्य जारी गर्दै राजमोले यस्तो आवश्यकतामा जोड दिएको हो ।
अमेरिका र इजरायलले इरानमाथि गरेको आक्रमण र त्यसको परिणामस्वरूप खाडीका विभिन्न देशमा गरिएको प्रत्याक्रमणबाट करिब १७ लाख नेपालीको जीवन सङ्कटमा परेको बताउँदै राजमोको उक्त वक्तव्यमा सम्बन्धित देशका सरकासित सम्पर्क गरेर विशेष उडानमार्फत नेपालीलाई स्वदेश फिर्ता गर्न आग्रह गरिएको छ ।
यस्तो छ, प्रेसवक्तव्यको पूर्ण पाठ :
“इरानमा भएको अमेरिका र इजरायलको आक्रमण तथा त्यसपछि इरानद्वारा गरिएको युद्धको परिणामस्वरूप खाडीका देशमा विभिन्न पेसामा गएका करिब १७ लाख नेपालीको जीवन सङ्कटमा पर्न गएको छ । त्यहाँ गएका नेपालीको करिब १७ लाख सङ्ख्या भएको बताइए पनि श्रमस्वीकृति नलिईकन जाने नेपालीको सङ्ख्या त्यो भन्दा बढी हुन सक्दछ । ती सबैको जीवनको रक्षाका लागि आवश्यक र प्रभावशाली कदम उठाउन राष्ट्रिय जनमोर्चाले सरकारको गम्भीर ध्यान आकर्षण गर्न चाहान्छ ।
इजरायलमा १० जना नेपालीको ज्यान गएको र विपिन जोशीको अपहरण परेको अवस्थामा नै मृत्यु भएको घटनाबाट नेपालीलाई धेरै नै दु:ख पुगेको थियो । इरानमा अमेरिकाले गरेको आक्रमणको बेलामा पनि एक जना नेपालीको मृत्यु भएको समाचार आएको थियो । खाडीका अहिले इरानले अमेरिकाको सैनिक अड्डा भएका कैयौँ देशमा र इजरायलमा समेत लगातार आक्रमण गरिरहेको छ । खाडीका देशमा त्यस प्रकारको युद्धको स्थिति अरू गम्भीर र व्यापक बन्दै जाने सम्भावनालाई पनि अस्वीकार गर्न सकिन्न । त्यसो भएमा नेपालीहरू ठुलो सङ्ख्यामा सङ्कटमा पर्ने सम्भावना रहनेछ । त्यसकारण खाडीका देशमा बस्ने नेपालीको सुरक्षाको लागि अहिलेदेखि नै सरकारले गम्भीर कदम चाल्नुपर्ने आवश्यकता छ । त्यसका लागि नेपालले अन्य देशका सरकारसित पनि सम्पर्क गरेर तथा उडानको व्यवस्था गरेर नेपालीको उद्दार गर्नुपर्ने आवश्यकतामा हामीले विशेष जोड दिन्छौँ ।”
