दोधाराचाँदनी । मुलुकभर चुनावी रौनक छाइरहेका बेला कञ्चनपुरको दोधारा चाँदनी–३ स्थित बादी बस्ती सुनसान छ ।
निर्वाचनको मिति नजिकिँदा दल तथा उम्मेदवार मतदाता रिझाउन व्यस्त छन् तर गरिबी, अशिक्षा, बेरोजगारीजस्ता समस्याले आक्रान्त बडुवाल टोलस्थित सीमान्तकृत समुदायमा न राज्यको प्राथमिकतामा पर्यो, न त दल र उमेदवारका ।
झन्डै तीन दशकदेखि बसोबास गर्दै आएको यो बस्तीमा बादी समुदायसहित अन्य समुदायका एक सय बढी घर परिवारको बसोबास छ ।
भारतमुखी रोजगारी र दैनिक मजदुरी गरेर जीविकोपार्जन गर्दै आएका यहाँका मतदाताको आशा थियो, निर्वाचनमा दल तथा उम्मेदवारले आफ्ना प्रतिबद्धतामा बादी समुदायलाई छुने खास योजना तथा कार्यक्रम ल्याउनेछन् तर त्यो आश निराशामा परिणत मात्रै भएन, भोट माग्नसमेत उम्मेदवार बस्तीमा नपुगेपछि बादी समुदाय निराश छन् ।
‘अहिलेसम्म हाम्रो बस्ती कोही नेता भोट माग्न आएनन्’ यहाँका स्थानीय बिरभाने बादीले भने– ‘यहाँ जङ्गली जनावरको डरले राति भाग्नुपर्ने अवस्था छ । नेता नआउँदा हाम्रो माग राख्न पाएनौँ ।’
उम्मेदवा बस्तीमा नपुग्दा यहाँका स्थानीयलाई चुनावले छोएको छैन । भारतसँग सीमा जोडिएको यो बस्तीमा गरिबी, अशिक्षा, बेरोजगारी, हात्तीआतङ्क, बाढी तथा कटान, सुकुम्बासी समस्या, अवैध तस्करी र सीमा विवाद प्रमुख समस्याका रूपमा रहेको यहाँका स्थानीय सीता बादीले बताइन् ।
‘हाम्रो समस्या धेरै छन् । उम्मेदवारहरू भोट माग्न आएनन् । हामीले पनि हाम्रो पीडा सुनाउँथ्यौँ’ उनले भनिन्– ‘सीमानामा हामी धेरै समस्या सहेर बसेका छौँ ।’
सीमानाकाको बस्तीमा अनेक दु:ख सहेर पनि सीमाको रक्षाका लागि यहाँ बसोबास गरिरहेको उनको भनाइ छ ।
‘आर्थिक अवस्था कमजोर हुँदा यहाँका बालबालिका पढाइ छोडेर रोजगारीका लागि भारत जान बाध्य छन्’ यहाँका स्थानीय रेशम बादीले भने– ‘चुनावमा नेताहरू आउलान् र हाम्रो माग राखौँला भन्ने थियो भोट माग्न नेता नै आएनन् ।’
राष्ट्रिय जनगणना २०७८ अनुसार सुदूरपश्चिममा बादी समुदायको जनसङ्ख्या दुई हजार पाँच सय ८० छ भने कञ्चनपुरमा मात्रै चार सय ५८ छ । (रासस)
