काठमाडौँ । नेकपा (मसाल) अमेरिकाद्वारा इरानका सर्वोच्च नेता खुमेनीको हत्यालाई साम्राज्यवाद विरोधी आन्दोलनप्रतिको क्षति बताएको छ ।

महामन्त्री मोहनविक्रम सिंहको हस्ताक्षरमा २०८२ फागुन १७ गते आइतबार प्रेसवक्तव्य जारी गर्दै मसालले सो धारणा व्यक्त गरेको हो ।

खुमेनीको मृत्युप्रति दु:ख प्रकट गर्दै मसालले महान् इरानी जनताप्रति समवेदना प्रकट गरेको छ । वक्तव्यमा खुमेनीको हत्याबाट इरानी जनताको साम्राज्यवाद विरोधी आन्दोलन कमजोर हुने होइन बरु त्यो अझै उच्च तहमा विकास हुने विश्वास व्यक्त गरिएको छ ।

ट्रम्पको जङ्गली राजका विरुद्ध स्वयम् अमेरिकामा र विश्वभरि साम्राज्यवाद विरुद्ध आक्रोश बढ्दै गएको बताउँदै वक्तव्यमा अन्तत: अमेरिकी साम्राज्यवादको नाश हुनु अवश्यम्भावी बताइएको छ ।

यस्तो छ, प्रेसवक्तव्यको पूर्ण पाठ :

“इरानका सर्वोच्च नेता खुमेनीको मृत्युप्रति नेकपा (मसाल) गम्भीर दु:ख प्रकट गर्दछ र त्यो अपूरणीय राष्ट्रिय शोकको अवस्थामा महान् इरानी जनताप्रति हार्दिक समवेदना प्रकट गर्दछ ।

यो अवश्य पनि सत्य हो कि इरानी जनताका लागि त्यो अत्यन्त ठुलो राष्ट्रिय क्षति हो । त्यो क्षतिबाट खालि इरानका जनता मात्र होइन, संसारभरका साम्राज्यवाद विरोधी तथा स्वतन्त्रता र शान्तिप्रिय जनतासमेत स्तब्ध भएका छन् । त्यसरी खुमेनीको मृत्यु खालि इरानी जनताका लागि मात्र होइन, विश्वभरका लागि नै ठुलो क्षति हो ।

इरानका सर्वोच्च नेता खुमेनीको मृत्युबाट इरानलाई अवश्य पनि ठुलो क्षति पुगेको छ तर हामीलाई के विश्वास छ भने त्यस प्रकारको क्षतिले इरान कमजोर हुने छैन र अमेरिकी साम्राज्यवाद विरुद्धको उनीहरूको सङ्घर्षले अरू उच्च तहमा विकास गर्नेछ र अन्त्यमा साम्राज्यवादमाथि इरानका जनताको विजय हुनेछ । उनीहरूको त्यो विजय संसारभरका उत्पीडित राष्ट्र र जनताको विजय हुनेछ । इरानका सर्वोच्च नेता खुमेनीको हत्याका लागि हामीले अमेरिकी साम्राज्यवाद र फासिस्ट इजरायल सरकारको कडा शब्दमा भत्र्सना गर्दछौँ ।

अहिले अमेरिकाले इरानमाथि जुन हमला गरेको छ, त्यो अमेरिकाको साम्राज्यवादी आतङ्कवादको नाङ्गो नमुना हो । अमेरिकाले खालि इरानमाथि मात्र हमला गरेको छैन, त्यसले ग्रिनल्यान्डमाथि पनि कब्जा गर्न खोजेको छ । क्यानडालाई अमेरिकाको एकाउन्नौँ राज्य बनाउन खोजेको छ । पनामा नहरमाथि कब्जा गर्न खोजेको छ । भेनेजुयलाका राष्ट्रपति मदुरोलाई अपहरण गरेको छ । त्यसरी ट्रम्पको नेतृत्वमा अमेरिकी साम्राज्यवादले जङ्गली राजको रूपमा विकास गरेको छ । इरानमाथि त्यसको आक्रमणको उद्देश्य पनि त्यहाँको तेलभण्डारमाथि कब्जा जमाउनु नै हो । त्यसरी स्पष्ट छ, अमेरिकी साम्राज्यवादले हिटलरको फासिस्ट नीतिको अनुसरण गर्दै संसारभरमा कब्जा जमाउन खोजेको छ ।

इजरायलको प्रधानमन्त्री नेतान्याहुले अमेरिकाको आडमा प्यालिस्टाइनी जनतामाथि फासिस्ट र बर्बर नरसंहार गर्दै आइरहेको छ । उनीहरूको त्यस प्रकारको फासिस्ट र बर्बर नीति अहिले इरानमा पनि देखा परेको छ तर त्यसले गर्दा विश्वव्यापी रूपमा नै उनीहरूका विरुद्ध आक्रोश बढ्दै गइरहेको छ । स्वयम् अमेरिकी जनतामा पनि ट्रम्पको फासिस्ट नीतिका विरुद्ध व्यापक जनमत देखा पर्दै गइरहेको छ ।

अमेरिकाले अहिले विश्वव्यापी रूपमा नै आफ्नो शक्ति प्रदर्शन गरिरहेको छ र त्यो शक्तिको बलमा “अमेरिका प्रथम” को नीतिलाई सफल पार्ने कोसिस गरिरहेको छ । यो कुरा प्रस्ट छ कि त्यस प्रकारको नाङ्गो प्रकारको शक्तिको प्रदर्शनका कारणले विश्वव्यापी रूपमा वा स्वयम् अमेरिकामा पनि त्यसका विरुद्ध व्यापक जनमत तयार हुँदै गइरहेको छ र त्यही कारणले त्यसको विनाश पनि हुने कुरा निश्चित छ ।

इरानी जनताले अमेरिकी साम्राज्यवाद विरुद्धको त्यो सङ्घर्षलाई उच्च तहमा अगाडि बढाइरहेका छन् र उनीहरूका सर्वोच्च नेता खुमेनीको हत्याका कारणले उनीहरूको साम्राज्यवादका विरुद्धको त्यो सङ्घर्ष कमजोर हुने छैन तर त्यसले साम्राज्यवादका विरुद्ध निर्णयात्मक विजय प्राप्त गर्नेछ भन्ने कुरामा हामीलाई पूरा विश्वास छ ।

अन्त्यमा हाम्रो पार्टीले इरानका सर्वोच्च नेता आयतोल्लाह अली खुमेनीप्रति उच्च सम्मान र श्रद्धाञ्जली प्रकट गर्दछ ।”