टेकराज भुसाल, सन्धिखर्क ।
राष्ट्रिय जनमोर्चाका नेताहरूले साम्राज्यवादका मतियारबाट देश जोगाउनु अहिलेको मुख्य आवश्यकता भएको बताएका छन् ।
कङ्ग्रेस, एमाले र तत्कालीन माओवादीले म्यान्डेटअनुसार काम गर्न नसकेपछि अमेरिकाले नेपालमा नयाँ एजेन्ट खटाएको आरोप लगाउँदै नेताहरूले यिनीहरूबाट देश जोगाउनुपर्नेमा जोड दिएका हुन् ।
२०८२ फागुन १६ गते शनिबार राजमो अर्घाखाँचीले ढाकाबाङमा आयोजना गरेको चुनावी कार्यक्रममा बोल्दै उनीहरूले यस्तो बताए ।
विदेशी शक्तिबाट सञ्चालित बार्बरा फाउन्डेसनका सदस्यले देशलाई थप सङ्कटमा धकेल्न लागेको जिकिर गर्दै नेताहरूले नेपाली जनता सचेत हुनुपर्ने जिकिर गरे ।
भूमिकास्थान नगरपालिकाको वडा नं. १ र वडा नं. २ ढाकाबाङका विभिन्न स्थानबाट राजमोका अगुवा कार्यकर्ताको सहभागितामा सम्पन्न सो कार्यक्रममा उम्मेदवार पशुपति ढकाल, राजमो केन्द्रीय सदस्य सागर केसी, लुम्बिनी प्रदेशका नेता शेरबहादुर बिसी, जिल्ला अध्यक्ष थम्मन केसी, अखिल नेपाल युवक सङ्घका केन्द्रीय सचिव ठाकुर पन्थी र अखिल नेपाल जनजाती सम्मेलनकी केन्द्रीय उपाध्यक्ष उषा पुनले सम्बोधन गर्नुभएको थियो ।
राजमो भूमिकास्थान–१ का अध्यक्ष हिमलाल खनालको अध्यक्षता, जिल्ला सचिवालय सदस्य जीवनारायण खनालको स्वागत मन्तव्य र राजमो भूमिकास्थान–२ का सचिव खिमबहादुर राउतको सञ्चालनमा सम्पन्न उक्त कार्यक्रममा जिल्ला उपाध्यक्ष गोपाल पौडेल, सचिवालय सदस्य कमलप्रसाद घिमिरे, देवेन्द्र कुँवरलगायतको आतिथ्य रहेको थियो ।
