बागलुङबजार । बागलुङ निर्वाचन क्षेत्र नं. १ मा निर्वाचन व्यवस्थापनसम्बन्धी भेला सम्पन्न भएको छ ।
साझा गठबन्धनका उम्मेदवार कृष्णप्रसाद शर्मा अधिकारीको प्रमुख आतिथ्यमा २०८२ फागुन १५ गते शुक्रबार जिल्ला सदरमुकाममा सो कार्यक्रम सम्पन्न भएको हो ।
कार्यक्रममा मन्तव्य राख्दै उम्मेदवार अधिकारीले मतदाता शिक्षा, मतदान प्रतिनिधिजस्ता व्यवस्थापकीय तथा विविन्न राजनीतिक विषयमा चर्चा गर्नुभएको थियो ।
गठबन्धनको जित सुनिश्चित गर्न सबै लाग्नुपर्ने आवश्यकतामा जोड दिँदै उहाँले मतदाता शिक्षादेखि प्राविधिक विषयसम्ममा मसिनो गरी लाग्न वा ध्यान दिन आग्रह गर्नुभयो ।
क्षेत्रव्यापी रूपमा निर्वाचन प्रचारप्रसार उत्साहजनक प्रकारले अघि बढेको दाबी गर्दै उहाँले यो उत्साहलाई विजयमा परिणत गर्नका लागि सबै नेताकार्यकर्ता आआफ्नो क्षेत्रमा जिम्मेवारीपूर्वक लाग्न अनुरोध पनि गर्नुभयो ।
कार्यक्रममा नेपाली कम्युनिस्ट पार्टीका केन्द्रीय सदस्यहरू हितमान शाक्य, बलावती शर्मा र कृष्ण केसीले पनि मन्तव्य राख्दै साझा स्प्रिट कायम गरेर विजय हासिल गर्न सबै लाग्नुपर्नेमा जोड दिनुभएको थियो ।
सो अवसरमा राष्ट्रिय जनमोर्चाका केन्द्रीय सदस्य राजेन्द्र ढुङ्गाना, राजमो केन्द्रीय सल्लाहकार अमरबहादुर थापालगायतको आतिथ्य रहेको थियो ।
क्षेत्र नं. १ निर्वाचन परिचालन समितिका संयोजक तिलक थापाको अध्यक्षता तथा सहसंयोजक कुमारविक्रम क्षेत्रीको सञ्चालनमा अघि बढेको सो कार्यक्रममा बागलुङ नगरस्तरीय प्रचारप्रसार समितिका संयोजक निर्मल श्रेष्ठले स्वागत गर्नुभएको थियो ।
कार्यक्रमपूर्व बागलुङ नगरपालिकाका वडा नं. १, २, ३ र ४ मा उम्मेदवार अधिकारीको नेतृत्वमा दुई सयभन्दा बढी नेताकार्यकर्ताको समूहले घरदैलो कार्यक्रम सम्पन्न गरेको थियो ।
