भक्तपुर, फागुन ११ । राष्ट्रिय जनमोर्चा भक्तपुर क्षेत्र नं. १ का उम्मेदवार ईश्वरी प्रसाद पैयानीले आफ्नो निर्वाचन क्षेत्रमा व्यापक प्रचारप्रसार तथा घरदैलो अभियान सञ्चालन गर्नुभएको छ ।
प्रचारप्रसार अभियानले गट्टाघर, सल्लाघारी, सूर्यविनायक, च्यामासिंह, ताथली, सुडाल, बागेश्वरी, नगरकोट, छालिङ, कमलविनायक, भक्तपुर दरबार स्क्वायर तथा थाती लगायतका स्थानमा गएर भेटघाट, पर्चा वितरण तथा माइकिङ कार्यक्रम सञ्चालन गरेको थियो ।
अभियानमा राष्ट्रिय जनमोर्चाका समानुपातिक उम्मेदवार मीनापुन, ठाकुरप्रसाद खनाल तथा ऋतु केसी पनि सहभागी हुनुहुन्थ्यो ।
नगरकोटमा भएको सङ्क्षिप्त कोणसभालाई समानुपातिक उम्मेदवार मीन पुनले सम्बोधन गर्नुभएको थियो । सम्बोधनमा उहाँले राष्ट्रिय जनमोर्चा विगतदेखि नै देश र जनताको हितमा निरन्तर सङ्घर्षरत रहेको दावी गर्दै यस चुनावमा “गणतन्त्र र धर्मनिरपेक्षताको रक्षा, सङ्घीयताको विरोध” आफ्ना मुख्य नारा रहेको बताउँनु भयो ।
पुनले “राष्ट्रिय जनमोर्चाले स्थानीय तहदेखि संसदसम्म काम गर्दा आजसम्म एक पैसा पनि भ्रष्टाचार नगरेको” दाबी गर्दै देशको वर्तमान परिस्थिति सामान्य नरहेको र विभिन्न घटनाक्रमले देशको राष्ट्रियता गम्भीर खतरामा परेको भन्दै चिन्ता व्यक्त गर्नुभयो ।
पुनले “नगरकोट पर्यटकीय क्षेत्र भएकाले त्यहाँका नागरिक सचेत, शिक्षित र अन्तर्राष्ट्रिय स्तरका मानिसहरूसँग सम्पर्क तथा विचार–विमर्श गर्न सक्ने क्षमता” भएको र जनताको यही उच्च चेतना र विवेकलाई आगामी चुनावमा सही ठाउँमा प्रयोग गर्न अनुरोध गर्नुभयो । उहाँले अगाडि भन्नु भयो “संसदमा कस्ता प्रतिनिधि पुग्छन् र उनीहरूले कस्तो कानुन बनाउँछन् भन्ने कुराले देशको भविष्य निर्धारण गर्ने छ ।”
अर्का समानुपातिक उम्मेदवार ठाकुर खनाल र ऋतु केसीले पनि पार्टीको नीतिगत धारणा र कार्यक्रमबारे जानकारी गराउँदै आफ्नो चुनाव चिन्हमा मतदान गर्न अपिल गर्नुभएको थियो ।
प्रचार तथा भेटघाट कार्यक्रममा उम्मेदवार तथा समानुपातिक उम्मेदवारसँगै राम प्रकाशपुरी, आनन्द शर्मा, ठाकुर खनाल, मीना पुन, निमबहादुर बुढाथोकी, सुधा शर्मा, ऋतु केसी, चन्द्रा थापा, गोविन्द शर्मा, छवि खनाल, मदन शर्मा, धनपति सापकोटा, विष्णु ओली, सगर सुवेदी, ईश्वरी शर्मा तथा राजेश गोसाई लगायत सहभागी हुनुहुन्थ्यो ।
प्रचार सामग्रीमा उम्मेदवारहरूको परिचय, पार्टीका नीति तथा प्रतिबद्धताहरू समेटिएका पर्चा, प्रतिबद्धता तथा कार्डका साथै घोषणपत्र वितरण गरिएको थियो ।
