काठमाडौँ । राष्ट्रिय जनमोर्चाका कार्यवाहक अध्यक्ष तथा समानुपातिक उम्मेदवार रश्मिराज नेपालीले आगामी फागुन २१ गतेपछि “नयाँ” भनिएकाले सरकारको नेतृत्व गरेमा नेपाल युद्धक्षेत्र बन्ने खतरा औल्याउनुभएको छ ।
युगदर्शन मिडियाका लागि प्रकाश थापामगरलाई २०८२ फागुन १० गते आइतबार भिडियो अन्तर्वार्ता दिँदै उहाँले यस्तो अभिव्यक्ति दिनुभएको हो ।
अन्तर्वार्ताको क्रममा उहाँले अहिलेको चुनावको मुख्य विषय नै अमेरिकी साम्राज्यवाद भएको दाबी गर्नुभयो ।
‘अहिले अमेरिकी साम्राज्यवाद फेरि एसिया महादेशमा प्रवेश गर्न खोज्दैछ’ चीनलाई घेर्ने उद्देश्यका साथ अमेरिका नेपाल आएको बताउँदै उहाँले भन्नुभयो– ‘अमेरिकाको यस्तो नीतिका विरुद्ध चीनले प्रतिकार गर्नासाथ नेपाल अमेरिकी स्वार्थअनुसारको युद्धक्षेत्र बन्नेछ ।’
उहाँले यसअघि अमेरिकी साम्राज्यवादले अफगानिस्तान, इराकमा विध्वंस मच्याइरहेको स्मरण गर्नुभयो ।
नेपालमा आफ्नो नयाँ कठपुतली कायम गर्न थालेको बताउँदै कावा अध्यक्ष नेपालीले अमेरिकाले घोषित रूपमा नै बालेन, रवि लामिछाने र
गगन थापालाई प्रधानमन्त्रीमा अघि सारेर नेपालमाथिको हस्तक्षेप बढाएर लगेको स्पष्ट पार्नुभयो ।
उहाँले भन्नुभयो– ‘नयाँ भनिएकाहरू सरकारमा आए नेपालको राष्ट्रिय अस्मिता नै सिद्धिन्छ ।’
कुराकानीको क्रममा उहाँले नेपालको राष्ट्रियतामािथ अहिले गम्भीर बन्दै आएको अमेरिकी साम्राज्यवादी खतराका विरुद्ध नेपाली जनता सचेत हुनुपर्ने बताउनुभयो ।
अहिलेको चुनावमार्फत देशभरिका जनतामाझ लोकतन्त्रसँगै राष्ट्रियता रक्षाको विषयमा जनचेतना फैलाइरहेको दाबी उहाँले गर्नुभयो ।
नेपालबाटै नयाँ दलाई लामाको खोजी
अन्तर्वार्ताको क्रममा अध्यक्ष नेपालीले नयाँ दलाई लामा नेपालबाट खोजी भइरहेको पनि खुलासा गर्नुभयो ।
‘नेपालका बुद्धिस्टमध्येबाट नयाँ दलाई लामाको खोजी गर्ने काम पनि भइरहेको छ’ उहाँको भनाइ थियो ।
नेपालबाट नयाँ दलाई लामा घोषणा गरिए नेपालको चीनसितको ऐतिहासिक र दौत्य सम्बन्ध तत्कालै समाप्त हुने ठोकुवा उहाँको थियो ।
अहिलेसम्मका नेपालका शासक ‘एक चीन’ नीतिको पक्षमा रहेको स्पष्ट पार्दै उहाँले अमेरिकाको नयाँ साम्राज्यवादी नीतिले गर्दा चीनसितको परम्परागत सम्बन्ध पूरै समाप्त हुने उहाँको विश्लेषण थियो ।
फागुन २१ गते चुनाव नभए देशमा भयावह स्थिति
राजमो नेता नेपालीले फागुन २१ गते चुनाव नभए देश भयावह अवस्थातर्फ जाने बताउनुभयो ।
‘यदि फागुन २१ गते चुनाव भएन भने देश भयावह अवस्थातर्फ जानेछ’ उहाँले भन्नुभयो– ‘त्यसैले निर्धारित समयमै चुनाव हुनुपर्दछ । त्यसो भयो भने देशले राजनीतिक निकास पाउनेछ ।’
आफूहरू आगामी चुनावबाट जनताका सबै समस्या समाधान हुनेछ भन्ने भ्रममा नरहेको तर चुनावले देश एउटा संवैधानिक लयमा फर्किने उहाँको अभिव्यक्ति थियो ।
अहिलेको अन्तरिम सरकार असंवैधानिक भएको तथा त्यसले प्रतिनिधिसभा विघटत गर्नु दुवै गलत भएको बताउँदै उहाँले फागुन २१ गते चुनाव नहुँदा देशमा संवैधानिक रिक्तता रहने भएकाले राजमोले निर्धारित समयमा चुनावमा जोड दिएको दाबीसेत गर्नुभयो ।
राजमोप्रति आकर्षण बढ्दो
कावा अध्यक्ष नेपालीले राजमोप्रति नेपाली जनताको आकर्षण बढ्दै गइरहेको बताउनुभयो ।
‘मैले काठमाडौँबाहिर र यहाँका पनि चुनाव प्रचारप्रसारमा भाग लिएको छु’ उहाँले भन्नुभयो– ‘हामीप्रतिको जनआकर्षण क्रमश: बढ्दै गएको छ ।’
प्रचारप्रसारको क्रममा राजधानी र राजधानीबाहिरका जनताको मानसिकतामा भएको फरक पनि उहाँले उल्लेख गर्नुभयो ।
उहाँले भन्नुभयो– ‘गाउँघरका जनतासित भेटघाट हुँदा उनीहरूले आफ्ना समस्या राख्दछन् र उम्मेदवारले के कस्ता योजना ल्याउनुहुन्छ भनेर सोध्छन् तर काठमाडौँमा त्यस खालको दोहोरो अन्तरक्रिया भएको पाइएन ।’
(राजमो कावा अध्यक्ष तथा उम्मेदवार नेपालीसँगको भिडियो अन्तर्वार्ताको पूर्ण पाठ हेर्न/सुन्नका लागि युगदर्शन मिडियाको युट्युब च्यानल वाच गर्न अनुरोध गरिन्छ ।)
