काठमाडौँ । राष्ट्रिय जनमोर्चा डोटीले २०८२ फागुन १२ गते मङ्गलबार केआइसिंह गाउँपालिका स्तरीय आमसभा गर्ने भएको छ ।
जिल्ला अध्यक्ष डबल बोगटीका अनुसार खुल्ला चुनाव प्रचारप्रसार कार्यक्रमअन्तर्गत सो पालिकाको सदरमुकाम वायलमा सभा गर्न थालेको हो ।
सभालाई राजमो महासचिव तथा डोटी निर्वाचन क्षेत्रबाट प्रतिनिधिसभा सदस्य पदका उम्मेदवार मनोज भट्टले प्रमुख अतिथिको रूपमा सम्बोधन गर्ने कार्यक्रम रहेको छ ।
बोगटीका अनुसार राजमो डोटीले उम्मेदवार भट्टसहित जिल्लाव्यापी भेटघाट कार्यक्रमलाई तीव्रता दिइरहेको छ । हालसम्म जोरायल गाउँपालिका, बडिकेदार गाउँपालिका, सायल गाउँपालिका, आदर्श गाउँपालिका र पूर्वीचौकी गाउँपालिकाका सबैजसो वडामा जनभेटघाट, पर्चा वितरणजस्ता कार्यक्रम सम्पन्न भइसकेको छ ।
आइतबार राजमो टोलीले केआईसिंह गाउँपालिकाको वडा नम्बर १ डुम्राकोटमा घरदैलो सम्पन्न गरेको थियो । अब केआइसिंह गाउँपालिका, शिखर नगरपालिका र बोगटान फुड्सिल गाउँपालिकाका केही वडामा पुग्न बाँकी रहेको जानकारी प्राप्त भएको छ ।
प्रचार टोलीमा महासचिव तथा उम्मेदवार भट्टसँगै जिल्ला अध्यक्ष बोगटी, जिल्ला उपाध्यक्ष रमेश अवस्थी, जिल्ला सचिव मानबहादुरसहित राजमो नेताहरूको सहभागिता रहेको छ ।
अध्यक्ष बोगटीका अनुसार राजमोप्रति डोटेली जनताको राम्रो सद्भाव र प्रतिक्रिया प्राप्त भइरहेको बताइएको छ ।
‘हामी अहिलेसम्म जहाँ जहाँ पनि घरदैलो कार्यक्रममा गयौँ, त्यहाँ त्यहाँ राजमोप्रति जनताको राम्रो सद्भाव प्राप्त भएको छ’ उहाँले भन्नुभयो– ‘उम्मेदवार पनि अरू दलको भन्दा सशक्त हुनुहुन्छ भन्ने जनताकै भनाइ छ ।
डोटी जिल्लामा दुई नगरपालिका र सात गाउँपालिका रहेका छन् । त्यहाँ एउटा मात्रै प्रतिनिधिसभा निर्वााचन क्षेत्र रहेको छ ।
