काठमाडौँ । काठमाडौँ क्षेत्र नम्बर ९ मा दलहरूबिच घरदैलो, कोणसभा र भेटघाट कार्यक्रम सञ्चालन भइरहेको छ । यसै सन्दर्भमा आज राष्ट्रिय जनमोर्चाका काठमाडौँ–९ का उम्मेदवार रोशन दानीले आफ्नो चुनावी प्रचारप्रसार कार्यक्रम सञ्चालन गर्नुभयो ।
प्रचार प्रसार कार्यक्रमअन्तर्गत मोटरसाइकल र्याली र भेटघाट कार्यक्रम गरिएको थियो ।
कार्यक्रमको सुरुमा राष्ट्रिय जनमोर्चाका का.वा. अध्यक्ष रश्मिराज नेपाली र केन्द्रीय सल्लाहकार आनन्द शर्माले सङ्क्षिप्त मन्तव्य राख्नु भएको थियो ।
बिहानैदेखि सुरु गरिएको कार्यक्रम दहचोक, स्विचाटार, बोलम्बु, नैकाप, रामकोट, कलङ्की, तिनथाना, ढुङ्गेअड्डा, भिमढुङ्गा र वाफललगायतका विभिन्न स्थानमा पुगेर समापन भएकाे थियाे ।
प्रचारप्रसारमा उम्मेदवारसँगै रश्मीराज नेपाली, आनन्द शर्मा, ठाकुर खनाल, छवि खनाल, जगत रेग्मी, लक्ष्मी केसी, सुधा शर्मा, निमबहादुर बुढाथोकी, ऋतु केसी, हिरा केसी, गणेश अधिकारी, रमेश पौडेल, धनपति सापकोटा, दिवाकर सुवेदी, निमबहादुर बुढा, मदन पाण्डे, चन्द्र थापा, गोविन्द शर्मा लगायत सहभागी हुनुहुन्थ्यो । टोलीले विभिन्न स्थानमा मतदातासँग चुनाव चिह्नमा मतदान गर्न आग्रह गर्दै पर्चा, कार्ड वितरण गर्नुका साथै भेटघाट गरेकाे थियो ।
उम्मेदवार दानीले आफ्नो चुनावी एजेन्डा स्पष्ट पार्दै पर्चा तथा भिजिटिङ कार्ड वितरण गर्नुभएको छ । ती प्रचार सामग्रीहरूमा गणतन्त्र, राष्ट्रियता र धर्मनिरपेक्षताको रक्षा, सङ्घीयताको विरोध, प्रदेश संरचना खारेज गरी स्थानीय तहलाई अधिकारसम्पन्न बनाउने, भ्रष्टाचारका विरुद्ध, शिक्षा र स्वास्थ्य सेवालाई सर्वसुलभ तथा गुणस्तरीय, विदेशी हस्तक्षेपको विरोध गर्दै राष्ट्रिय स्वाभिमानको संरक्षण आदि विषय उल्लेख गरिएको छ ।
जनताको सुझाव र गुनासा आफूले सङ्कलन गरिरहेको र निर्वाचित भए त्यसलाई प्राथमिकताका साथ सम्बोधन गर्ने उम्मेदवार दानीले बताउनुभयो ।
