विष्णु शर्मा ##

गाउँघर सहर पार्टीहरूको टोली
दशऔँला जोडेर कति मिठो बोली ?
जितेपछि लाउने अबिर अहिले नै रातै
के चलन आयो खै गलाभरि खादै

सन्चो र बिसन्चोको खबर पनि लिने
साह्रै दु:ख भएकालाई दुईचार पैसा दिने
काम गर्न लाएकालाई काममा सघाउने
दुखख्का कुरा सुन्दा आँसु बगाउने

साच्चैजस्तो गरिदिने नाटक मञ्चन पनि
छुट्याउनै अप्ठ्यारो कुन हो सज्जन भनी
सबले भन्छन् देशको लागि अर्पिन्छौ ज्यान
तालिमयुक्त तान्नलाई जनताको ध्यान

सोझा सिधा जनता त्यसैमा मख्ख
बाचा गर्छन् हजुरलाई भोट दिन्छौ पक्का
मौकापरस्त हुन् भन्ने चेतना नहुनाले
पश्चिमाले हाम्रो देश युक्रेन बनाउन थाले

राजनैतिक पृष्ठभूमि नचाहिने उम्मेदवार बन्न
अरू चाहिन्न शक्तिकेन्द्रले पर्छ ओके भन्न
पूरा गर्नुपर्छ पछि प्रभुका एजेन्डाहरू
खुसी पार्न देश पनि सुम्पिदिउँला बरु

सुन्नुभयो एमसिसी विरुद्धका कुरा ?
आएका छन् बगलीमा लुकाएर छुरा
सिमानाको विषयमा खोल्दैनन् मुख
चिनौँ सबले देशको रगत खाने जुका

रातभरि निदाउँदैनन् सिमानाका जनता
भोको पेट छ पाउँदैनन् राम्रो धन्दा
त्यता पनि जाँदैनन् यिनीहरूका आँखा
चुनावपछि लाग्नेछन् यिनी लाखापाखा

दुई दिनको रामछायामा हामी भुल्ने होइन
अहिले गणतन्त्र रक्षाबाहेक अरू विकल्प छैन
भन्न भन्लान् कोहीले आमूल परिवर्तनका कुरा
कम्युनिस्ट पार्टीका क्यारेडरहरू बन्नुहुन्न भुरा

धर्मनिरपेक्षताको रक्षा हाम्रो जिम्मेवारी
भाइभाइमा झगडा गरी नहसाऊ जोरीपारी
भुइँमा भा’को टिप्न खोज्दा खोल्टीको पोखिएला
मिठा भाषण र भिडमा लाग्दा देशै सकिएला

राष्ट्रियताको रक्षामा बोलौँ जहाँ भए पनि
देशको माया मुटुमा सजाउ जहाँ गए पनि
परदेशीले प्रदेशबाट भोट दिन पाएनौँ ऐले पनि
सही चिह्नमा भोट सबले असल नागरिक बनी