दाङ । चुनावसित सम्बन्धित विभिन्न समिति गठन गर्दै राष्ट्रिय जनमोर्चा दाङ क्षेत्र नं. २ को चुनावी भेला घोराहीमा सम्पन्न भएको छ ।
राजमो केन्द्रीय सदस्य तथा दाङका अध्यक्ष गणेश आचार्यको प्रमुख आतिथ्यमा २०८२ माघ १९ गते शनिबार सो कार्यक्रम सम्पन्न भएको हो ।
फागुन २१ गते हुन गइरहेको प्रतिनिधिसभा निर्वाचनको प्रचारप्रसार योजना तय गर्ने र प्रशिक्षणात्मक भेलाको सिलसिलामा सो कार्यक्रमको आयोजना गरिएको आयोजकले जनाएको छ ।
देशको समसामयिक राजनीति र भिन्न परिस्थितिमा हुन गइरहेको निर्वाचनको बारेमा मन्तव्य राख्दै प्रमुख अतिथि आचार्यले प्रशिक्षण दिनुभएको थियो ।
अखिल नेपाल युवक सङ्घका पूर्व केन्द्रीय अध्यक्ष काशीनाथ पोखरेलले पनि विभिन्न पार्टीका चरित्रको बारेमा र राजमोले खेलेको भूमिकाबारे आफ्नो धारणा राख्नुभएको थियो ।
कार्यक्रमलाई क्षेत्र नं. २ का प्रत्यक्ष उम्मेदवार मनिराम खनालले आफ्नो अमूल्य मतले अहिले देशको भविष्य निर्धारण गर्ने भएकाले आफ्नो मतको दुरुपयोग नगर्न र गिलासमै मतदान गर्न सम्पूर्णमा अनुरोध गर्नुभएको थियो ।
त्यस्तै, समानुपातिक उम्मेदवार कृष्णा राना, अखिल (छैठौं) का केन्द्रीय सदस्य तथा दाङका अध्यक्ष सेवक भट्टराई, जातीय समता समाज दाङका सचिव बलदेव विक, अखिल नेपाल जनजाति सम्मेलन दाङका सदस्य भौना चौधरी, अखिल नेपाल महिला सङ्घ दाङकी जिल्ला सदस्य हेमा पोखरेललगायतले शुभकामना मन्तव्य राख्नुभएको थियो ।
चुनाव परिचालन समितिका संयोजक रामबहादुर जिएमको अध्यक्षतामा सम्पन्न सो कार्यक्रममा राजमो जिल्ला सदस्य मेघराज भट्टराईले स्वागत मन्तव्य राख्नुभएको ।
कार्यक्रमको सहजीकरण अखिल नेपाल ट्रेड युनियन महासङ्घ (अन्टुक) का जिल्ला सदस्य कमल पन्थीले गर्नुभएको थियो ।
भेलाले रामबहादुर जिएमको संयोजकत्वमा ४१ सदस्यीय निर्वाचन परिचालन समिति गठन गरेको छ ।
त्यस्तै, सुरेशकुमार पाण्डेको संयोजकत्वमा एक सय ५१ सदस्य चुनाव प्रचारप्रसार समिति, मङ्गलबहादुर घर्तीमगरको संयोजकत्वमा २१ सदस्य युवा परिचालन समिति, मेघराज भट्टराईको संयोजकत्वमा पाँच सदस्यीय आर्थिक परिचालन समिति र उत्सव पुनको संयोजकत्वमा तीन सदस्य सांस्कृतिक समिति गठन गरिएको छ ।
राजमोका अनुसार क्षेत्र नं. २ का पालिका र वडामा प्रत्यक्ष उम्मेदवार मनिराम खनालसहित जनभेटघाट तथा घरदैलो अभियान तय गरेको छ ।
