काठमाडौँ । लिम्पियाधुरासमेतका भूभाग समेटिएको नक्सा र समग्र सीमासँग सम्बन्धित विषय, तथ्यप्रमाण समेटेर पुस्तक प्रकाशन गर्ने तयारी हुँदै छ । २०७७ साउन २ गते आयोजना गरिएको एक बोल्दै भूमिव्यवस्था, सहकारी तथा गरिबी निवारण मन्त्री पद्माकुमारी अर्यालले त्यस्तो जानकारी दिनुभएको हो ।

सिङ्गो सीमासँग जोडिएका विषय र त्यो क्षेत्रलाई विस्तृत रूपमा पुस्तकमा लिपिबद्ध गर्नुपर्छ भनेर नापी विभाग मार्फत् मन्त्रालयले कामको थालनी गरेको मन्त्री अर्यालले जानकारी दिनुभयो । मन्त्री अर्यालले भन्नुभयो– ‘कालापानी, लिम्पियाधुरासम्मका भएका इतिहास, ऐतिहासिक पक्ष, अन्तर्राष्ट्रिय सीमा सिद्धान्त र तथ्यप्रमाण राखेर निकट भविष्यमै त्यो किताब प्रकाशन गर्ने तयारीमा छौँ ।’

मन्त्रालय भूमि प्रशासनको क्षेत्रमा नयाँ ढङ्गले जानका निम्ति जमर्को गरिरहेको भन्दै उहाँले एकपछि अर्को गर्दै विगतमा भन्दा सिर्जनशील, प्रगतिशील र मौलिक ढङ्गले अगाडि बढ्ने प्रयत्नमा रहेको बताउनुभयो । केही नयाँपना दिनका निम्ति मन्त्रालयको टिमले सङ्कल्प गरेको भन्दै उहाँले नयाँ छवि दिने भन्ने मन्त्रालयको टिमले सङ्कल्प रहेको उहाँको दावी थियो । ती काम प्रकट पनि भएको भन्दै मन्त्री अर्यालले भन्नुभयो– ‘यहाँहरूले देख्नुभएकै छ, एकपछि अर्को गर्दै नयाँ खालका काम हामीले बाहिर पनि ल्याएका छौँ । यसको रिजल्ट आइसकेको पनि छ ।’

राष्ट्रियताका सन्दर्भमा सिङ्गो राज्यलाई सहयोग पुग्ने गरी मन्त्रालयले महत्त्वपूर्ण काम गरेको भन्दै मन्त्री अर्यालले विगतमा छुटाइएको भूभाग समेटेर नेपालको नक्सा जारी गरेको बताउनुभयो । भएका तथ्यप्रमाणको आधारमा नक्सा प्रकाशन गरेपछि ती तथ्यप्रमाणमा काम गरिरहँदा यसो गरेको भए हिजोदेखि ती चिज हामीसँग भएको भए समस्या हुने थिएन भन्ने कुरा पनि प्रकट भएको भन्दै मन्त्री अर्यालले त्यो विषयका बुझाइमा पनि अनेकता रहेको बताउनुभयो ।

मन्त्रालय वार्षिक कार्ययोजनामा मात्र केन्द्रित नभएर अन्य फरक खालका सिर्जनशील कार्यमा पनि हामी अगाडि बढेको मन्त्री अर्यालले बताउनुभयो । भूमिव्यवस्था मन्त्रालयले प्रकाशन गरेको भूमि शब्दकोषको तेस्रो संस्करण र २०४७ सालयता मन्त्रालयद्वारा गठन गरिएका केन्द्रीय आयोगको गठन आदेश, कार्यादेश, आयोगले गरेका कामकारबाही समेटिएको पुस्तक मन्त्री अर्यालले विमोचन गर्नुभएको हो ।

मन्त्री अर्यालले भूमि शब्दकोषले भूमिसम्बन्धी शब्दका बारेमा ज्ञान बाँड्ने, कमीकमजोरी सच्याउने बताउँदै शब्दकोषमा छुटाइएको भूमि समेटेर तयार पारिएको नेपालको नयाँ नक्सासमेत समेटिएकाले पुस्तक विशेष रहेको जानकारी दिनुभयो ।