दुबई । इरानमा विरोध प्रदर्शनमाथि भएको कडा दमनको पृष्ठभूमिमा इरानका विदेशमन्त्री अब्बास अराघचीले संयुक्त राज्य अमेरिकाविरुद्ध अहिलेसम्मकै सबैभन्दा प्रत्यक्ष चेतावनी दिनुभएको छ ।

उहाँले यदि इरानमाथि नयाँ आक्रमण भयो भने इस्लामिक गणतन्त्रले उपलब्ध सबै सैन्य क्षमताबाट जवाफी कारबाही गर्ने स्पष्ट सन्देश दिनुभएको हो ।

द वाल स्ट्रिट जर्नलमा प्रकाशित आफ्नो अभिमत लेखमार्फत विदेशमन्त्री अराघचीले इरानका सशस्त्र फौज पूर्ण रूपमा तयार रहेको बताउँदै सन् २०२५ को जुनमा इजरायलसँग भएको १२ दिने युद्धका बेला अपनाइएको संयम अब दोहोरिन नसक्ने सङ्केत गर्नुभयो । उहाँका अनुसार, यस्तो अवस्था उत्पन्न भएमा त्यसको असर केवल इरान वा इजरायलमै सीमित नहुने, सम्पूर्ण क्षेत्र र विश्वभरका सर्वसाधारण प्रभावित हुनेछन् ।

यो चेतावनी अमेरिकी विमानवाहक युद्ध समूह एसियाबाट पश्चिमतर्फ, मध्यपूर्व नजिकिँदै गरेको अवस्थामा आएको हो ।

अमेरिकी नौसेनाका एक अधिकारीका अनुसार युएसएस अब्राहम लिङ्कन नेतृत्वको समूह हिन्द महासागर हुँदै मध्यपूर्वतर्फ अघि बढिरहेको छ, जसले क्षेत्रीय तनाव अझ चर्किने सङ्केत दिएको छ ।

यसैबीच, इरानमा भएको विरोध प्रदर्शनमा मृत्यु हुनेको सङ्ख्या चार हजार ५०० नाघेको दाबी अमेरिका–आधारित मानव अधिकार कार्यकर्ता समाचार एजेन्सीले गरेको छ । एजेन्सीका अनुसार हजारौँ मानिस पक्राउ परेका छन् र मृत्युदण्डको सम्भावनालाई लिएर गम्भीर चिन्ता बढेको छ ।

इरानका सर्वोच्च नेता आयातोल्लाह अली खमेनीले समेत हजारौँको ज्यान गएको स्वीकार गर्दै त्यसको दोष संयुक्त राज्य अमेरिकालाई दिनुभएको छ ।यद्यपि हाल केही दिनदेखि सडक प्रदर्शन देखिएको छैन, जनवरी ८ देखि इन्टरनेट बन्द भएकाले वास्तविक क्षतिको विवरण अझै बाहिर आउन बाँकी रहेको विश्लेषकहरूको भनाइ छ । यस अवस्थाले इरान–अमेरिका सम्बन्धमा गहिरो तनाव कायम राख्दै मध्यपूर्वलाई नयाँ अस्थिरताको दिशातर्फ धकेल्ने खतरा बढाएको छ ।