हिमाचल भुंतर । हिमाचलको कुल्लु जिल्ला अन्तर्गत भुन्तरमा अलपत्र परेकी एक नेपाली महिलालाई मूल प्रवाह अखिल भारत नेपाली एकता समाजको पहलमा उद्दार गरी स्वदेश पठाइएको छ ।
प्राप्त जानकारी अनुसार गत ११ जनवरीको राती भुंतर प्रहरीले योजनाबद्ध तरिकाले होटलमा छापामार्दा अनैतिक देहव्यापारको पुष्टि भएको थियो । यसमा हमीरपुरकी एक महिलालाई पक्राउ गरी २४ वर्षीय नेपाली मूलकी युवतीलाई रेस्क्यु गरिएको थियो ।
कुल्लू र लाहौल स्पिति अदालतको आदेशअनुसार १२ जनवरीमा प्रहरीले पीडितालाई कुल्लूको वन स्टप सेन्टरमा संरक्षण गर्दै आएको थियो । उक्त नेपाली युवती घटना पछि डराइरहेकी थिइन् र बारम्बार घर जानको लागि अनुरोध गर्दै आएकी थिइन् ।
वन स्टप सेन्टर कुल्लूकी सेन्टर एडमिनिस्ट्रेटर सुजाता शर्माले मूल प्रवाह अखिल भारत नेपाली एकता समाजलाई सम्पर्क गरेकी थिइन् । त्यसपश्चात मूल प्रवाहका नगर अध्यक्ष कन्हैया चौधरी, उपाध्यक्ष मनीराम राधिका लामा, सल्लाहकार राजा ठाकुर र अन्य सदस्यहरू वन स्टप सेन्टर कुल्लूकी सेन्टर पुगेका थिए । उनीहरूले उक्त स्थानमा पुगेपछि युवतीलाई नेपाल पठाउन कागजी प्रक्रिया भुंतर प्रहरीसँग मिलेर पूरा गरेको थियो ।
मूल प्रवाहका नगर अध्यक्ष कन्हैया चौधरीले बताए कि १६ जनवरी शुक्रबार सबैको संयुक्त प्रयासले उक्त नेपाली युवतीलाई ट्राभलमार्फत नेपाल पठाइएको छ । भारत–नेपाल सीमामा मूल प्रवाहका कार्यकर्ताहरूले नेपाल प्रहरीको मद्दतमा पीडित युवतीलाई उनको परिवारको जिम्मा लगाउनेछन् ।
