काठमाडौँ । राष्ट्रिय जनमोर्चा काठमाडौँको उपाध्यक्षमा दिवाकर सुवेदी चयन हुनुभएको छ । राजमो काठमाडौँको २०८२ पुस २९ गते बसेको बैठकले सो निर्णय गरेको हो ।
जिल्ला अध्यक्ष झबिन्द्र बेलबासेको हस्ताक्षरमा पुस ३० गते जारी गरिएको प्रेसविज्ञप्तिका अनुसार पूर्व जिल्ला उपाध्यक्ष राजेन्द्र पुडासैनीले पार्टीनीति विपरीत काम गरेकाले उहाँलाई हटाई सुवेदीलाई उपाध्यक्षमा चयन गरिएको उल्लेख छ ।
प्रेसविज्ञप्तिमा फागुन २१ गतेको चुनावका लागि काठमाडौँका सबै प्रतिनिधिसभा निर्वाचन क्षेत्रबाट उम्मेदवारी दिइने जानकारी दिइएको छ । त्यसका लागि तत्कालै नगर समितिका बैठक वा छलफल गरिने उल्लेख छ ।
त्यस्तै विज्ञप्तिमा अमेरिकाद्वारा भेनेजुयलाका राष्ट्रपति निकोलस मदुरोलाई निजकी पत्नीसहित गिरफ्तार गरेर अमेरिका पुर्याउने गतिविधिको विरोध गरिएको छ ।
विज्ञप्तिमा अमेरिकी साम्राज्यवादको सो नीतिलाई साम्राज्यवादी आतङ्क बताउँदै त्यसको विरोध गर्न अपिल गरिएको छ ।
यस्तो छ, प्रेसविज्ञप्तिको पूर्ण पाठ :
“राष्ट्रिय जनमोर्चा काठमाडौँ जिल्ला समितिको बैठक अध्यक्ष झबिन्द्र बेलबासेको अध्यक्षतामा सम्पन्न भयो । बैठकले गरेका निर्णय सार्वजनिक गर्नका लागि यो प्रेसविज्ञप्ति प्रकाशित गरिएको छ ।
१. बैठकले अमेरिकाले जनवरी ३ मा भेनेजुयला विरुद्ध ठुलो मात्रामा हमला गरी भेनेजुयलाका राष्ट्रपति निकोलस मदुरो र उनकी श्रीमतीलाई जबरजस्ती नियन्त्रणमा लिएको थियो । त्यसपछि ट्रम्पले पत्रकार सम्मेलनमा अमेरिकाले भेनेजुयलामाथि शासन गर्ने दाबी गरेका छन् । मदुरोलाई लागुऔषध कारोबार र आतङ्कवादी मुद्दामा हाल न्युयोर्कको एक कारागारमा राखिएको छ । अमेरिकी राष्ट्रपति डोनाल्ड ट्रम्पले आफूलाई भेनेजुयलाको कार्यवाहक राष्ट्रपति उल्लेख गरिएको तस्बिर सामाजिक सञ्जालमा पोस्ट गरेका छन् । यसबाट अमेरिकाी राष्ट्रपति ट्रम्पले संयुक्त राष्ट्र सङ्घको घोषणापत्र वा अन्तर्राष्ट्रिय कानुनको समेत अतिक्रमण गरेर विभिन्न देशमाथि आक्रमण गर्ने र विश्वका देशलाई नै कब्जा गर्ने साम्राज्यवादी नीतिको हाम्रो पार्टीले विरोध गर्दछ । उसले ग्रिनल्यान्डमाथि पनि कब्जा गर्ने, क्यानडालाई अमेरिकाको एकाउन्नौँ राज्य बनाउने कोसिस गरिराखेको छ । इरानमाथि सिधै आक्रमण गरी त्यहाँ राजतन्त्रको पुनस्र्थापना गर्नका लागि जोड गरिरहेको छ । त्यसका साथै पनामाको नहरलाई पनि अमेरिकाले कब्जा गर्नेजस्ता धम्की दिइरहेको छ । यस प्रकारको नीति अमेरिकी साम्राज्यवादी आतङ्क नै हो भन्ने बैठकले ठहर गरेको छ ।
अमेरिकाको त्यस प्रकारको आतङ्कवादी नीतिका कारणले सम्पूर्ण विश्वलाई शान्ति, सुव्यवस्था र विभिन्न देशको राष्ट्रियता र सार्वभौमिकतामा खतरा उत्पन्न भएको छ । यस प्रकारको अमेरिकी साम्राज्यावादी आतङ्क तुरुन्त रोक्न हाम्रो पार्टीले जोड दिन चाहन्छ ।
२. बैठकमा आगामी २०८२ फागुन २१ गते हुने प्रतिनिधिसभा सदस्यका लागि काठमाडौँ जिल्लाका सबै निर्वाचन क्षेत्रमा पार्टीको तर्फबाट उम्मेदवारी मनोनयन गर्ने निर्णय गरेको छ ।
३. चुनावी तयारीका लागि आगामी २०८२ माघ १७ गते जिल्ला भेला गरी आवश्यक तयारी गर्ने निर्णय गरिएको छ ।
४. त्यसअघि सबै नगर पार्टीका नगरभेला निर्वाचन क्षेत्रका बैठक, छलफल २०८२ माघ १० गतेसम्म गरिसक्ने निर्णय गरिएको छ । त्यसका लागि सबै नगर, निर्वाचन क्षेत्रभित्रका सम्बन्धित पार्टी कमिटी, सदस्य, शुभचिन्तक, समर्थक, सबैलाई चुनावी तयारीका लागि लाग्न आह्वान गर्ने निर्णय गरिएको छ ।
५. जिल्ला पार्टीका उपाध्यक्ष राजेन्द्र पुडासैनीले पार्टीको नीति विपरीत गतिविधि, क्रियाकलाप र अभिव्यक्ति दिएको पाइएकाले सदस्यसमेत नरहने गरी हटाइएको छ । उक्त रिक्त पदमा दिवाकर सुवेदीलाई पदपूर्ति गरिएको छ ।”
