तौलिहवा । कपिलवस्तु जिल्लाको शिवराज नगरपालिका वडा नं. ४ को वर्गदहवा मुस्लिमगाउँमा राष्ट्रिय जनमोर्चाको प्रशिक्षण सम्पन्न भएको छ ।
राजमो कपिलवस्तुका सचिव केरसिंह अदैको प्रमुख आतिथ्यमा २०८२ पुस २९ गते मङ्गलबार सो कार्यक्रम सम्पन्न भएको हो ।
सो अवसरमा मन्तव्य राख्दै अदैले राष्ट्रियता, गणतन्त्र, धर्मनिरपेक्षताको रक्षा तथा सङ्घीयता र एमसिसी खारेजीको विषयमा विस्तृत प्रशिक्षण दिनुभएको थियो ।
राजमो सानो छ, केही गर्न सक्दैन भन्ने प्रश्नको जबाफ दिँदै उहाँले राष्ट्रियता, जनजीविका, मजदुर–किसानको पक्षमा संसद् र सडकमा आवाज उठाउने वा सङ्घर्ष गर्ने पार्टी नै सबैभन्दा सही भएको र त्यो पार्टी राजमो नै भएको स्पष्ट पार्नुभयो ।
ठुला भन्ने राजनीतिक दलले नै देशलाई बर्बादीतिर लगेको उहाँको ठोकुवा थियो ।
कार्यक्रममा राजमो शिवराज नगर समितिका उपाध्यक्ष मोहन विकले पनि जेनजी आन्दोलन र सुशीला कार्की सरकारबारे प्रकाश पार्नुभएको थियो ।
राजमो बर्गदहवा गाउँ समितिका अध्यक्ष हुसेन मुल्लाको अध्यक्षतामा अघि बढेको उक्त कार्यक्रमको सञ्चालन जाकिर हुसेन मुसलमानले गर्नुभएको थियो ।
