काठमाडौँ । बिहीबार काठमाडौंको धुम्बाराहीमा नेपाल कम्युनिष्ट पार्टी (मसाल) का महामन्त्री मोहनविक्रम सिंह र नेपाली कम्युनिष्ट पार्टीका सहसंयोजक माधवकुमार नेपालबीच भेटवार्ता भएको छ ।
भेटवार्ताका क्रममा दुई नेताहरूबीच भेनेजुयला प्रकरण, आगामी निर्वाचन लगायतका विषयमा कुराकानी भएको मसालका प्रवक्ता रामप्रकाश पुरीले जानकारी दिनुभयो ।
भेनेजुयलाका राष्ट्रपति निकोलस मदुरोमाथि अमेरिकी कारबाहीबारे दुई दलबीच समान धारणा छ । सो प्रकरणमा आगामी दिनमा विरोधका कार्यक्रम गर्ने समझदारी भएको मसाल प्रवक्ता पुरीले बताउनु भयो ।
यस्तै, बैठकमा आगामी निर्वाचनमा नेकपा र राष्ट्रिय जनमोर्चाबीच तामेलको सम्भावना बारे पनि छलफल भएको पुरीले जानकारी दिए ।
‘फागुन २१ गते हुने प्रतिनिधि सभा निर्वाचनमा मिलेर जान सकिन्छ कि भन्ने विषयमा साथीहरूले कुरा राख्नुभयो ।’ पुरीले भन्नु भयो– ‘विगतमा गठबन्धनबाटै पाएको धोकाबारे पनि कुराकारी भयो । ठोस सहमति भने भएको छैन तर छलफल सकारात्मक छ ।’
बिहीबार भएको भेटवार्तामा नेकपाका सहसंयोजक नेपालसहित नेताहरू प्रमेश हमाल, चिरन पुन, देवेन्द्र पौडेललगायत सहभागी थिए भने मसाल महामन्त्री सिंहसहित प्रवक्ता पुरी, राष्ट्रिय जनमोर्चाका उपाध्यक्ष दुर्गा पौडेल, नेताहरू भैरव रेग्मी, आनन्द शर्मा, वाशुदेव पोखरले, घनश्याम न्यौंपाने लगायतको सहभागिता थियो।
