खलङ्गा । हाम्रो सङ्गठन अखिल नेपाल जनजाति सम्मेलनले सञ्चालन गरेको प्युठान जिल्लाको स्वर्गद्वारी नगरपालिका, माण्डवी गाउँपालिका र प्युठान नगरपालिकाको वडा नम्बर ५ र ६ मा एकमहिने साङ्गठनिक अभियान २०८२ पुस २४ गते समापन गरिएको छ ।
सम्मेलनले करिब एक महिनासम्म “संविधान, गणतन्त्र र धर्मनिरपेक्षताको रक्षा गरौँ, प्रतिगमन र साम्राज्यवादी हस्तक्षेपको विरोध गरौँ” भन्ने मूल नारासहित सम्मेलनका केन्द्रीय अध्यक्ष निमबहादुर बुढाथोकीमगरको नेतृत्वमा पालिकाका विभिन्न टोल, गाउँ र वडामा पुगी सभा, जनभेटघाट, प्रशिक्षण, सदस्यता वितरण, समिति गठनलगायत विविध कार्यक्रम गरी सम्पन्न गरेको छ ।
उद्देश्य
अखिल नेपाल जनजाति सम्मेलनले आदिवासी जनजातिको अधिकार र स्वयत्तताको रक्षा गर्न र साम्राज्यवादी हस्तक्षेपको विरोध गर्नका लागि यो कार्यक्रम सञ्चालन गरेको हो ।
गठन र इतिहास
यो सङ्गठनको स्थापना २०४४ सालमा भएको थियो । यसले आदिवासी जनजातिका हकअधिकार, भाषा, धर्म, संस्कृति र लिपिको संरक्षणमा यसले काम गर्दै आएको छ ।
समस्याको विश्लेषण
अभियानमा आदिवासी जनजातिले भोग्दै आएको जातीय शोषण, उत्पीडन र भेदभावको सामना गर्नु परिरहेको ठहर गरिएको छ र त्यसका लागि यस प्रकारका अभियान, प्रशिक्षण, छलफल, अन्तक्र्रिया गर्नु आवश्यक रहेको महसुस गरिएको छ ।
एकता र सद्भाव
सङ्गठनले नेपाल बहुजातीय, बहुभाषिक र बहुसांस्कृतिक मुलुकको रूपमा एकता र सद्भाव कायम राख्नुपर्ने कुरामा मुख्य जोड दिएको छ ।
माग
सङ्गठनले आदिवासी जनजातिको वास्तविक मुक्ति र स्वायत्तताको लागि सङ्घर्ष गर्दै राज्यको एकाधिकारको विरोध गरेको छ । आफ्ना यी विषयमा माग राख्दै जनजाति आन्दोलन अगाडि बढाउनु अभियानले ठहर गरेको छ । त्यसरी सङ्घर्ष गर्दा जनजाति आन्दोलनको उदेश्य के हुनुपर्दछ ? जनजातिको धर्म, जाति, भाषा, संस्कृति र आर्थिक विकासको संरक्षण गर्नुपर्दछ भन्ने कुरालाई बढी ध्यान दिइएको छ । जनजाति आन्दोलनको उद्देश्य त्यही हुनुपर्दछ भन्ने ठहर अभियानको छ ।
मिसनरी गतिविधि
जनजातिलाई धर्म परिवर्तन र सांस्कृतिक प्रभाव विरुद्ध जनजातिको अधिकारको रक्षा गर्नुपर्दछ भन्ने ठहर जनजाति सम्मेलनले गरेको छ ।
अभियान र आन्दोलनको प्रभाव
गत भदौ २३–२४ गतेको आन्दोलनले देशव्यापी रूपमा तोडफोड, आगलागी र ध्वंसात्मक कार्य भयो । त्यसको तीव्र रूपमा विरोध, छलफल भएपछि त्यो कार्य गलत थियो भन्ने ठहर गरियो ।
अन्तर्राष्ट्रिय प्रभाव
अभियानमा अमेरिकी एम्बेसीद्वारा नेपाललाई चीनको रणनीतिअन्तर्गत बनाउन खोजिएको आरोप जनजाति सम्मेलन र अभियानको ठहर छ ।
जनजाति उत्थान
आदिवासी जनजातिको मानसिक बौद्धिक विचारलाई माथि उठाउन त्यस प्रकारका तालिम र प्रशिक्षण अभियान चलाउनुपर्ने आवश्यकता महसुस भयो ।
निष्कर्ष
राष्ट्रको एकता र सार्वभौमिकताको संरक्षणका लागि आदिवासी जातजातिमा जनचेतना आवश्यक रहेको ठहर भयो ।
जनजाति सम्मेलनको यो एकमहिने साङ्गठनिक अभियान राष्ट्रियस्तरको तीनओटा प्रशिक्षण पालिकास्तरीय गाउँटोल, वडास्तरीय करिब ४५ ओटा प्रशिक्षण, दुईओटा सभा, ३२ ओटा समिति गठन भएका छन् । सयौँ स्थानमा जनभेटघाट र हजारौँलाई सम्मेलनको सदस्यता वितरण गरेको छ ।
उक्त अभियानलाई सम्पन्न गर्न प्युठान जिल्ला समिति र नगरपालिकाको महत्त्वपूर्ण योगदान रह्यो । त्यसका लागि हाम्रो सङ्गठनले धेरै धेरै धन्यवाद दिन चाहन्छ । सम्मेलनका केन्द्रीय समितिका पदाधिकारी, सदस्यहरू पालैपालो अभियानमा खटिनुभएको थियो । जिल्लाजिल्लाका साथीहरूले कार्यक्रम के कसरी चलिरहेको छ भन्ने उत्साह, सोधपुछ, चिन्ता, कुराकानीले अभियानलाई थप उत्साहित बनाएको थियो ।
आगामी दिनमा स्वयम् जनजाति सम्मेलन र प्युठान जिल्ला पार्टीले सङ्गठनात्मक सुदृढीकरणमा बढी ध्यान दिनु जरुरी छ । यस प्रकारका कार्यक्रम अझै पनि चलाउनुपर्ने आवश्यकता छ ।
– निमबहादुर बुढाथोकीमगर
