काठमाडौँ । लुम्बिनी प्रदेश र गण्डकी प्रदेशबाट राष्ट्रिय जनमोर्चाले चारओटा उम्मेदवारी दिएको छ ।

राजमोले लुम्बिनीबाट बोमबहादुर खत्री र पद्मा पण्डित तथा गण्डकी प्रदेशबाट शङ्कर बराल र लक्ष्मी बासकोटालाई उम्मेदवार बनाएको हो ।

घोराहीबाट खत्रीले र पोखराबाट राजमो नेता कृष्ण अधिकारीले युगदर्शनलाई सो जानकारी दिनुभयो ।

दाङमा उम्मेदवारी दर्ता गर्दा खत्रीको प्रस्तावकमा प्युठान मल्लरानी गाउँपालिका अध्यक्ष कृष्णबहादुर खड्का तथा समर्थकमा प्युठान ऐरावती गाउँपालिकाका उपाध्यक्ष कृष्ण श्रेष्ठ तथा पण्डितको प्रस्तावकमा अर्घाखाँची भूमिकास्थान नगरपालिकाका प्रमुख झबिलाल थापा तथा समर्थकमा प्युठान स्वर्गद्वारी नगरपालिकाका उपमेयर मीनराज राना रहनुभएको थियो।

उम्मेदवारी दर्ता गर्ने समयमा राजमो केन्द्रीय सदस्य तथा दाङ जिल्ला अध्यक्ष गणेश आचार्य, राजमो नेता सुरेश थापा, अखिल नेपाल युवक सङ्घका पूर्व अध्यक्ष काशिनाथ पोखरेल, अखिल नेपाल महिला सङ्घकी कृष्ण राना, अखिल नेपाल प्रगतिशील लेखक सङ्घ (अन्पा) लुम्बिनीका उपाध्यक्ष सुरेशकुमार पाण्डे, राजमोका भीमलाल न्यौपाने, चन्द्रबहादुर केसी, मेघराज भट्टराई, सेवक भट्टराई, शोभाराम आचार्य, कु्रन्तादेवी खड्का, ङनुकान्त आचार्य, सुशीला नेपाली, शोभा पोखरेलको उपस्थिति रहेको थियो ।

पोखराबाट उम्मेदवारी दर्ता गर्दा बरालको प्र्रस्तावकमा बागलुङ जैमिनी नगरपालिकाका मेयर नरबहादुर पुन तथा समर्थकमा बागलुङ काठेखोला गाउँपालिका उपाध्यक्ष तिलक थापा हुनुहुन्थ्यो भने बास्कोटाको प्र्रस्तावकमा तिलक थापा तथा समर्थकमा नरबहादुर पुन रहनुभएको थियो ।

बरालले खुल्ला सदस्यमा र बास्कोटाले महिला सदस्यमा उम्मेदवारी दिइरहँदा राजमो नेता कृष्ण अधिकारी र राजमो कास्कीका अध्यक्ष रविमोहन ढकालको पनि उपस्थिति रहेको थियो ।

लुम्बिनीबाट उम्मेदवारी दर्ता गराउनुभएका खत्री हाल राजमो लुम्बिनी प्रदेश समितिका अध्यक्ष हुनुहुन्छ । शिक्षक पृष्ठभूमिबाट नेकपा (मसाल) को राजनीति सुरु गर्नुभएका खत्री प्युठान जिल्ला विकास समितिका सभापति भइसक्नुभएको छ । २०६४ सालको संविधानसभा निर्वाचनमा उहाँ झिनो मतले पराजित हुनुभएको थियो । उहाँ राजमोको केन्द्रीय कोषाध्यक्षसमेत रहिसक्नुभएको छ ।

लुम्बिनीकै अर्की उम्मेदवार पण्डित जुझारु महिलानेतृ हुनुहुन्छ । हाल राजमो केन्द्रीय सल्लाहकार रहनुभएकी पण्डित प्युठानबाट राजनीतिमा सक्रिय हुनुहुन्छ । उहाँ राजमोनिकट अखिल नेपाल महिला सङ्घकी केन्द्रीय उपाध्यक्ष हुनुहुन्छ ।

गण्डकी प्रदेशबाट राजमो उम्मेदवार शङ्कर बराल हाल केन्द्रीय सदस्य तथा गण्डकी प्रदेश समितिका अध्यक्ष हुनुहुन्छ । २०४२ सालको बमकाण्डका आरोपी बरालले त्यति बेला जेलसजाय भोगिसक्नुभएको छ । उहाँ यसअघि अखिल (छैठौं) का महासचिव र राजमोको केन्द्रीय उपाध्यक्ष रहिसक्नुभएको छ । उहाँ पोखरामा रहेर राजमोको राजनीति अगाडि बढाइरहनुभएको छ ।

गण्डकी प्रदेशकै अर्की उम्मेदवार बासकोटा राजमोनिकट अखिल नेपाल महिला सङ्घकी केन्द्रीय सचिव हुनुहुन्छ । कानुन व्यवसायीसमेत रहनुभएकी बास्कोटा बागलुङमा रहेर विभिन्न सामाजिक कार्यक्रममा समेत सक्रिय हुनुहुन्छ । राजमो केन्द्रीय सदस्यसमेत रहनुभएकी बास्कोटा २०७४ सालको निर्वाचनबाट बागलुङ वडा नं. ३ को वडाध्यक्ष हुनुहुन्थ्यो ।

राष्ट्रियसभाको निर्वाचन आगामी माघ ११ गते हुन गइरहेको छ ।