खलङ्गा । प्युठानको ऐरावती गाउँपालिकाअन्तर्गत वडा नं. ६ धैराचौर टोलमा राष्ट्रिय जनमोर्चाको प्रशिक्षण कार्यक्रम सम्पन्न भएको छ ।
रक्तिम सांस्कृतिक अभियानका अध्यक्ष गिरीप्रसाद बुढाको प्रमुख आतिथ्यमा २०८२ पुस २० गतेका दिन सो कार्यक्रम सम्पन्न भएको हो ।
राजमो ६ नं. वडासमितिका अध्यक्ष मोहन बस्नेतको अध्यक्षता रहेको उक्त कार्यक्रममा अखिल नेपाल किसान महासङ्घ (अप्फा) प्युठानका कोषाध्यक्ष कर्ण बहादुर राई, राजमो ऐरावती गाउँपालिका समितिका अध्यक्ष चन्द्रबहादुर राना, ६ नं. वडाका अध्यक्ष भरतबहादुर खड्कालगायतको आतिथ्य रहेको थियो ।
कार्यक्रममा राजमो ऐरावती गाउँ समितिका अध्यक्ष चन्द्रबहादुर रानाले प्रशिक्षणको औचित्यसम्बन्धी सङ्क्षिप्त मन्तव्य राख्नुभएको थियो भने समसामयिक राजनीतिक परिस्थितिसम्बन्धी प्रमुख अतिथि बुढाले प्रशिक्षण दिनुभएको थियो ।
प्रशिक्षणपश्चात् प्रश्नोत्तर कार्यक्रम राखिएको थियो ।
वडासमितिका सचिव बेगम नेपालीको स्वागत मन्तव्य रहेको सो कार्यक्रमको सञ्चालन युवा नेता शिव श्रेष्ठले गर्नुभएको थियो ।
