काठमाडौँ । राष्ट्रिय जनमोर्चाले अध्यक्ष चित्रबहादुर केसी सहित कार्यवाहक अध्यक्ष रश्मीराज नेपाली र उपाध्यक्ष तथा प्रवक्ता दुर्गा पौडेललाई पनि सो पार्टीले समानुपातिक उमेदवार बनाएको छ ।
यस्तै, आदिवासी जनजातिको महिलातर्फ संविधानसभा सदस्य मिना पुन (बागलुङ), सकुन्तला राना (अर्घाखाँची) क्रमशः एक र दुई नम्बरमा रहनुभएको छ । त्यस्तै सोही कलस्टरको पुरुषतर्फ गिरीप्रसाद बुढा र अमरध्वज राना क्रमशः एक र दुई नम्बरमा रहनुभएको छ ।
पार्टीले पुस १३ गते निर्वाचन आयोगमा खसआर्यको महिला तर्फ उपाध्यक्ष तथा प्रवक्ता दुर्गा पौडेललाई एक नम्बरमा र खसआर्य कै पुरुषतर्फ अध्यक्ष केसीको नाम एक नम्बरमा राखेर समानुपातिक उमेदवारहरूको बन्द सूची दर्ता गराएको हो ।
त्यस्तै संविधानसभा सदस्य तथा पार्टीका कार्यवाहकअध्यक्ष रश्मीराज नेपालीलाई पार्टीले सोही कलस्टरको पुरुषतर्फ दुई नम्बरमा राखेर समानुपातिक उम्मेदवारहरूको बन्द सूची दर्ता गराएको छ ।
जनमोर्चाले निर्वाचन आयोगमा पेस गरेको ११० जना उम्मेदवारको बन्दसूचीमा प्रवासी नेपालीहरूको पनि प्रतिनिधित्व गराएको छ । जसमाः भारतमा रहनुभएका ठाकुर प्रसाद खनाल, प्रेम प्रसाद पौडेल, तारा बहादुर सोमरे मगर रहनुभएको छ ।
त्यस्तै हङकङबाट सक्तमान बुढाथोकी, जापानबाट रेणु गुरुङलाई पनि समानुपातिक उम्मेदवारहरूको बन्द सूचीमा दर्ता गराएको छ ।
राष्ट्रीय जनमोर्चाले ५० प्रतिशत महिलासहित एक सय १० जनाको बन्दसूची आयोगमा बुझाइएको छ । नियमावलीअनुसार खसआर्य ३३ जना (३०.२८ प्रतिशत), आदिवासी जनजाति ३२ (२८.७२ प्रतिशत), मधेसी १८ (१६.१५ प्रतिशत), दलित १५ (१३.४४ प्रतिशत), थारू ७ (६.५ प्रतिशत) र मुस्लिम ५ (४.८० प्रतिशत) गरी एक सय १० जनाको समानुपातिक तर्फको बन्दसूची बुझाइएको छ ।
