काठमाडौँ । अखिल (छैठौं) ले आगामी माघ महिनाभरि प्युठानका प्युठान नगरपालिका, मल्लरानी गाउँपालिका र ऐरावती गाउँपालिकामा एकमहिने सङ्गठनात्मक अभियान सञ्चालन गर्ने भएको छ ।

२०८२ पुस ४–५ गते रुपन्देहीको बुटवलमा सम्पन्न केन्द्र्रीय समितिको बैठकले सो निर्णय गरेको हो ।

अध्यक्ष सुवास जिसीको हस्ताक्षरमा पुस ८ गते जारी प्रेसवक्तव्यमा जेनजी आन्दोलनको नाममा मच्याइएको विध्वंस, आगलागी, तोडफोड र लुटपाटका लागि दोषीमाथि कारबाही गर्न माग गरिएको छ ।

जेनजी आन्दोलन मूलत: युवाविद्यार्थीको आन्दोलन भएको स्पष्ट पार्दै वक्तव्यमा भ्रष्टाचारको अन्त र सुशासन यसको मुख्य उद्देश्य रहेको बताइएको छ तर अहिलेको सरकारले युवाका ती मागप्रति बेवास्ता गरेको आरोप लगाइएको छ ।

विज्ञप्तिमा केन्द्र्रीय सदस्यको थपघटसम्बन्धी निर्णय भएको पनि जानकारी दिइएको छ ।

यस्तो छ, प्रेसविज्ञप्तिको पूर्ण पाठ :

“हाम्रो सङ्गठनको चौथो पूर्ण बैठक युनियनका अध्यक्ष सुवाश जिसीको अध्यक्षता र महासचिव पुरण पोख्रेलको सञ्चालनमा यही पुस ४ र ५ गते बुटवलको चाँदबारीमा सम्पन्न भयो । बैठकमा नेकपा (मसाल) का महामन्त्री कमरेड मोहनविक्रम सिंहको प्रमुख आतिथ्यता एवम् समसामयिक विषयमा प्रशिक्षणात्मक मन्तव्य रहेको थियो । बैठकले गरेका महत्त्वपूर्ण निर्णय सार्वजनिक गर्नका लागि यो वक्तव्य जारी गरिएको छ ।

१. बैठकमा देशको राजनैतिक स्थितिको बारेमा गम्भीर छलफल भएको छ । खासगरी गत भदौ २३ र २४ गतेका घटनाको बेग्लाबेग्लै समीक्षा गरिएको छ । भदौ २३ गतेको युवाहरूको आन्दोलनमा उठाइएका एजेन्डालाई हाम्रो सङ्गठनले समेत समर्थन गरेको थियो । त्यो आन्दोलनमा खासगरी भ्रष्टाचार र सामाजिक सञ्जालमाथिको प्रतिबन्धको विरोध गरिएको थियो । शान्तिपूर्ण रूपमा सुरु गरिएको युवाको आन्दोलनमाथि राज्यले भीषण दमन गरेको थियो र कैयौँ विद्यार्थीको सडकमै हत्या भएको थियो । उक्त अपराध क्षम्य हुन सक्दैन । त्यसका लागी तत्कालीन सरकार जिम्मेवार हुन्छ । हामीले उक्त नरसंहारको उचित छानबिन र दोषीलाई कानुनी कारबाहीको माग गर्दछौँ ।

भदौ २४ को विध्वंस, आगलागी, तोडफोड र लुटपाटका घटनालाई पहिलो दिनको युवाको आन्दोलनसँग जोड्न मिल्दैन । २४ गतेको घटना नियोजित, योजनाबद्ध र आपराधिक प्रवृतिको घटना हो । त्यस प्रकारको अपराधमा संलग्न व्याक्तिलाई पनि छानबिन गरी कडा कानुनी कारबाही गर्नु अनिवार्य छ । हामीले यी दुबै घटनाका दोषीलाई कारबाही गर्न सरकारसँग जोडदार माग गर्दछौँ । युवाविद्यार्थीको आन्दोलन, त्यसपछि सरकारको गठन र अहिले पनि विदेशी साम्राज्यवादी शक्तिको विभिन्न प्रकारको सक्रियता, संलग्नता, घुसपैठ, चलखेल र तिकडमको हामीले कडा शब्दमा भण्डाफोर गर्दछौँ ।

२. युवा आन्दोलनको स्पष्ट सन्देश हो– देशमा भ्रष्टाचारको अन्त्य गर्नु र सुशासन कायम गर्नु तर युवाहरूले दिन खोजेको सन्देशलाई हालको सरकार र पार्टीले सही ढङ्गले बुझ्न नसकेको हाम्रो ठहर छ । देशको भ्रष्टाचार र सुशासनको प्रमुख कारक सङ्घीयता हो । सङ्घीयताको प्रमुख पक्ष प्रादेशिक सरकार हुन् । ती सरकार खारेज नगरेसम्म देशमा भ्रष्टाचार संस्थागत रूपले स्थापित हुनेछ र देश झन् झन् आर्थिक सङ्कटको दुष्चक्रमा पर्नेछ तर वर्तमान सरकार, स्वयम् आन्दोलनकर्ता युवा र देशका राजनैतिक शक्ति सङ्घीयता खारेजीको बहसमा सामेल छैनन् । त्यसको अर्थ हो– देशको भ्रष्टाचार र सुशासन स्थापना गर्न अझै पनि ठोस र उचित बहसतिर देश प्रवेश गरेको छैन । त्यसकारण आगामी दिनमा सङ्घीयता खारेजीको आन्दोलनलाई अझ सशक्त रूपले लैजानुको विकल्प छैन ।

३. गत साउनमा सम्पन्न जनवर्गीय मोर्चाको कार्यशालाको निर्णयबमोजिम हाम्रो सङ्गठनलाई एकमहिने अभियानको लागि प्युठानको मल्लरानी, ऐरावती र प्युठान नगरपालिकाको जिम्मा प्राप्त भएको थियो । सोहीबमोजिम आगामी माघ महिनाभर हाम्रो सङ्गठनले प्युठानका उल्लेखित तीनओटा स्थानीय तहमा साङ्गठनिक अभियान सञ्चालन गर्ने निर्णय गरेको छ । त्यसका लागि केन्द्रीय समितिका साथीको जिम्मेवारी बाँडफाँड भएको छ । हामीले उक्त अभियानलाई सफल बनाउन सम्पूर्ण विद्यार्थी साथीमा हार्दिक अपिल गर्दछौँ ।

४. सङ्गठनसम्बन्धी केही महत्त्वपूर्ण निर्णय भएका छन् । कार्यव्यस्तताका कारण कतिपय साथीले दिनुभएको राजीनामा स्वीकृत भएको छ । कतिपय साथीले सङ्गठनमा समय उपलब्ध गराउन नसक्नुभएको कारण केन्द्रीय समितिवाट बिदा गर्ने निर्णय भएको छ । केन्द्रीय उपाध्यक्ष देवेन्द्र पौडेल उच्च शिक्षाको लागि विदेश जानुभएको कारण उहाँको पदमा केन्द्रीय सचिवालय सदस्य कुलचन्द्र शर्मा (रुपन्देही) लाई मनोनित गरिएको छ । रिक्त सचिवालय सदस्यमा केन्द्रीय सदस्य सेवक भट्टराई (दाङ) लाई वढुवा गरिएको छ ।

केन्द्रीय सदस्यहरू केशव बुढाथोकी, सरिता पुन, सन्ध्या भट्टराई, प्रकाश चुँदाली, सिर्जना सुवेदी, अंशु ठडराई र वैकल्पिक सदस्यहरू हिमाल शाही र सचिन ढकाललाई समितिबाट बिदाई गरिएको छ । बैठकले सङ्गठनको उपाध्यक्ष र केन्द्रीय सदस्यबाट बिदाई हुने साथीलाई केन्द्रीय समिति र सङ्गठनमा रहेर पुर्‍याउनुभएको योगदानको उच्च मूल्याङ्कन गर्दै हार्दिक धन्यवाद व्यक्त गरेको छ । त्यसरी रिक्त भएको केन्द्रीय सदस्य पदमा वैकल्पिक सदस्यहरू पृथ्वी रोका, निशा गौतम र वर्षा पोख्रेललाई बढुवा गरिएको छ । त्यसैगरी नयाँ केन्द्रीय सदस्यमा सागर एमसी (रुपन्देही), कविता राना (अर्घाखाँची), दीपक बन्जाडे (काठमाडौँ), राजकुमार राना (कैलाली) र वैकल्पिक केन्द्रीय सदस्यमा बसन्त राज गोराथोकी (प्युठान) र आदित्य पन्त (गुल्मी) लाई चयन गरिएको छ ।”