प्रलेस श्याम प्रसाद स्मृति पुरस्कारसहित विभिन्न साहित्यिक पुरस्कार वितरण
काठमाडौँ । आफूले तत्काल सामाजिक सञ्जाल बन्द नगर्न आफूले आग्रह गर्दागर्दै केपी ओलीले अस्वीकार गरेको नेकपा (एमाले) का उपाध्यक्ष रघुजी पन्थले बताएका छन् ।
पन्थले पुस पाँच गते, शनिबार सम्पन्न प्रगतिशील लेखक संघ, नेपालको आयोजनामा सम्पन्न ‘प्रलेस पुरस्कार समर्पण’ कार्यक्रमको प्रमुख अतिथिको आसनबाट सम्बोधनका क्रममा सो धारणा राख्नुभएको हो ।
“मैले मेटा सामाजिक सञ्जाललाई तत्कालै नियमन गर्ने विषयमा सोंच्नु पर्दछ भनेको थिएँ’, प्रमुख अतिथि पन्थले भने– ‘तत्कालिन प्रधानमन्त्रीले मन्नु भएन, उहाँ झोंक्की हुनुहुन्छ, बन्द गरिहाल्नु भयो ।’ पन्थले नेपालका स–साना उद्योग कलकारखानाहरूले राज्यलाई कर तिर्नुपर्ने तर मेटा एउटा कम्पनीले नेपालको सार्वभौमसत्ता स्वीकार नगर्नु दुखद भएको बताए ।
सामाजिक सञ्जालका कैयौँ राम्रा पक्षहरू हुँदाहुँदै पनि त्यसले वर्तमान समाजलाई अध्ययनबाट विमुख बनाएको पन्थको भनाई थियो । ‘साहित्यले समाजको चेतना निर्माण र लोकतान्त्रिक मूल्यको संरक्षणमा खेल्ने भूमिका खेल्नु पर्ने हुन्छ’ पन्थले जोड दिए ।
नेपाल प्रगतिशील लेखक संघ (प्रलेस) द्वारा प्रदान गरिने श्याम प्रसाद स्मृति नामका विभिन्न साहित्यिक पुरस्कार यस वर्षका लागि योग्य स्रष्टाहरूलाई प्रदान गरिएको छ। प्रगतिशील साहित्य, संस्कृति र विचारको क्षेत्रमा उल्लेखनीय योगदान पुर्याउने स्रष्टाहरूलाई सम्मान गर्न उक्त पुरस्कार प्रदान गरिएको हो ।
यस वर्षको प्रलेस श्याम प्रसाद स्मृति पुरस्कार प्रगतिशील साहित्यकार ईश्वर चन्द ज्ञवालीलाई प्रदान गरिएको छ । त्यस्तै प्रलेस प्रतिभा पुरस्कार (श्यामप्रसाद स्मृति) लेखक तथा राजनीतिज्ञ अनिल शर्मालाई प्रदान गरिएको छ । प्रलेस अन्तर्गत पुरस्कार वितरक समितिका संयोजक समिर सिंहले जानकारी दिए ।
सिंहका अनुसार प्रलेस बाल साहित्य पुरस्कार (श्यामप्रसाद स्मृति) बाल साहित्यकार सुशिला प्रधानलाई प्रदान गरिएको छ । कार्यक्रममा प्रलेस युवा पुरस्कार (श्याम प्रसाद स्मृति) युवा लेखक तथा साहित्यकार रूपक अलंकारलाई प्रदान गरिएको छ ।
उक्त पुरस्कारहरू नेपाल कम्युनिस्ट पार्टी (एमाले) का उपाध्यक्ष तथा प्रलेसका सल्लाहकार रघुजी पन्थद्वारा पुरस्कृत गरिएको थियो ।
कार्यक्रममा प्रलेसका पदाधिकारी, साहित्यकार, लेखक, संस्कृतिकर्मी तथा विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो ।
