प्रकाश थापामगर, काठमाडौँ ।
राष्ट्रिय जनमोर्चाका महासचिव मनोज भट्टले कुनै पनि सरकारको पहिलो काम जनजीविकाको सम्बोधन गर्ने हुनुपर्नेमा सुशीला कार्की सरकारको पहिले काम जननिर्वाचित संसद्को हत्या गर्नु रहेको बताउनुभएको छ ।
२०८२ मङ्सिर २७ गते शनिबार नेकपा (एमाले) को एघारौँ महाधिवेशनको उद्घाटनसत्रमा शुभकामना मन्तव्य राख्दै उहाँले सो धारणा व्यक्त गर्नुभएको हो ।
‘कुनै पनि सरकारको पहिलो काम जनजीविकाको सम्बोधन गर्नु हुन्छ’ उहाँले भन्नुभयो– ‘तर सुशीला कार्की सरकारको पहिलो काम भनेकै जननिर्वाचित संसद् विघटन गर्नु रह्यो ।’
जेनजी आन्दोलनको नाममा जननिर्वाचित संसद् र सरकार विघटन गरेर असंवैधानिक सरकार गठन गर्ने काम भएको उहाँको भनाइ थियो ।
उहाँले भन्नुभयो– ‘जनताबाट निर्वाचित नागरिक सरकार विघटन गरेर झन् असंवैधानिक सरकार गठन गर्ने काम भयो ।’
कार्की सरकारको संसद् विघटन गर्ने कार्यलाई उहाँले महेन्द्र र ज्ञानेन्द्रले जस्तै प्रतिगामी कदमको संज्ञा दिनुभयो ।
‘जसरी राजा महेन्द्र र ज्ञानेन्द्रले जननिर्वाचित संसद् विघटन गरेका थिए, त्यस्तै काम कार्की सरकारले गर्यो’ उहाँले भन्नुभयो ।
सङ्क्षिप्त मन्तव्यको क्रममा जेनजी आन्दोलनको आवरणमा देश अर्कैले चलाउँछ भन्ने पुष्टि भएको महासचिव भट्टको भनाइ थियो ।
‘जेनजी आन्दोलनबाट देश अर्कैले चलाउँछ भन्ने पुष्टि भएको छ’ उहाँले भन्नुभयो– ‘साम्राज्यवादीले चेतावनी दिएका छन्, यदि तिमीले हामीले भनेको मानेनौँ भने तिमीहरूकै मान्छे प्रयोग गरेर तिमीहरूकै विरुद्ध काम गराउनेछौँ ।’
जेनजी आन्दोलनका लागि अर्बौं रकम लगानी गरी साम्राज्यवादीले उनीहरूका मुद्दालाई हाईज्याक गरेको उहाँको विश्लेषण थियो ।
‘जेनजीले सामाजिक सञ्जालमाथिको रोक र भ्रष्टाचारको विरोध गरेका थिए’ उहाँले भन्नुभयो– ‘साम्राज्यवादीले जेनजीको मुद्दा हाईज्याक गरे ।’
दोष कसलाई दिने ?
महाधिवेशनलाई शुभकामना दिँदै महासचिव भट्टले २०६३ सालपछि पालैपालो गणतन्त्र पक्षधर राजनीतिक शक्ति नै सत्तामा आएकाले अहिलेको यो अवस्थाका लागि को जिम्मेवार छ भनेर विचार गर्नुपर्ने आवश्यकतामा जोड दिनुभयो ।
‘२०६२–६३ सालको जनआन्दोलनपछि पालैपालो गणतन्त्र पक्षधर पार्टी नै सत्तामा पुगेका छन्’ उहाँले प्रश्न गर्नुभयो– ‘एमालेको यो महाधिवेशनले पनि विचार गर्नुपर्दछ, अहिलेको अवस्थाका लागि दोष कसलाई दिने हो ?’
आफ्नो गाँठ बलियो बनाए छिमेकीलाई दोषी दिनुनपर्ने लोकोक्तिको उदाहरण दिँदै उहाँले एमाले यसबारे समीक्षा गर्नुपर्ने बताउनुभयो ।
‘जेनजी आन्दोलनको निशाना गणतन्त्र पक्षधर राजनीतिक पार्टी किन भए ? शासकीय स्वरूप र जनजीविकाको समस्यालाई सम्बोधन गर्नमा कहाँनेर कमजोरी भयो ? यसबारे एमालेको यो महाधिवेशनले विचार गरोस्’ उहाँले भन्नुभयो ।
उहाँले एमाले महाधिवेशनको भव्य सफलताको शुभकामनासमेत व्यक्त गर्नुभयो ।
