दाङको लमहीमा राष्ट्रिय जनमोर्चाको प्रचारात्मक जनसभा

देउखुरी । अखिल नेपाल किसान महासंघ (अफ्फा) का केन्द्रीय अध्यक्ष भैरवराज रेग्मीले तीन ठुला राजनीतिक दलका कारण देश खरानी भएको बताउनु भएको छ । राष्ट्रिय जनमोर्चा जिल्ला कार्य समिति दाङ—देउखुरीले बिहीबार दाङको लमहीमा आयोजना गरेको प्रचारात्मक जनसभालाई सम्बोधन गर्दै रेग्मीले सो अभिव्यक्ति दिनु भएको हो ।

केन्द्रीय अध्यक्ष रेग्मीले आफूलाई ठुला दल बताउने कांग्रेस, एमाले र माओवादीको सत्ता लुटकै कारण जेनजी आन्दोलन भएको इंगित गर्नुभयो । उहाँले पछिल्लो समय तीन ठुला दलकै कारण देशमा व्यापक भ्रष्टाचार, अनिमितता र कुशासन मौलाएको भन्दै जेनजी पुस्ता आन्दोलनमा उत्रिएको टिप्पणी गर्नु भयो । साथै अध्यक्ष रेग्मीले भदौ २३ र २४ को जेनजी आन्दोलनबाट भएका सम्पूर्ण घटनाको नैतिक जिम्मेवारी तत्कालिन सत्तापक्ष र प्रतिपक्ष दलहरूले लिनुपर्ने टिप्पणी गर्नुभयो ।

त्यसैगरि राष्ट्रिय जनमोर्चाका कार्यकारी अध्यक्ष रेश्मीराज नेपाली ठुला दलका नेताहरूको अहमताले जेनजी आन्दोलन भएको बताउनुभयो । उहाँले तीन ठुला दलहरू कै लुटतन्त्र कै कारण देशमा गणतन्त्र, संविधान र राष्ट्रियता खतरामा पुगेको बताउनु भयो । कार्यकारी अध्यक्ष नेपालीले काँग्रेस, एमाले र माओवादीले आलोपालो बाँडीचुँडी खाने प्रबृतिले देशमा जेनजी आन्दोलनले स्थान पाएको टिप्पणी गर्नुभयो ।

राजमो केन्द्रीय सदस्य कमला जिसी, अखिल नेपाल राष्ट्रिय स्वतन्त्र विद्यार्थी युनियन छैंठौंका केन्द्रीय सदस्य सेवक भट्टराई, उद्योग व्यापार संघ जिल्ला सचिव ठाकुर भण्डारी लगायतले मन्तव्य दिनुभएको थियो ।

सभा राष्ट्रिय जनमोर्चा दाङका अध्यक्ष गणेश आचार्यको अध्यक्षता, उपाध्यक्ष महेश रिजालको स्वागत मन्तव्यबाट सुरू भएको थियो । कार्यक्रमको सञ्चालन जिल्ला सचिव बसन्तराज शर्मा पौडेलले गर्नु भएको थियोे ।