कलैया । अखिल नेपाल किसान महासङ्घ (अप्फा) को बारा जिल्ला भेला सम्पन्न भएको छ ।
केन्द्रीय अध्यक्ष भैरवराज रेग्मीको प्रमुख आतिथ्यमा २०८२ मङ्सिर १५ गते सोमबारका दिन डुमरवानामा सो भेला सम्पन्न भएको हो ।
भेलामा प्रमुख अतिथि रेग्मीसँगै राष्ट्रिय जनमोर्चाका केन्द्रीय सदस्य धर्मानन्द सुवेदी र अखिल नेपाल महिला सङ्घकी केन्द्रीय सदस्य सरस्वती पौडेलले प्रशिक्षणात्मक मन्तव्य राख्नुभएको थियो ।
सो अवसरमा उहाँहरूले ६७ प्रतिशत किसान जनसङ्ख्या रहेको नेपालमा किसानले दैनिक १८–२० घण्टा काम गरेर पनि खान नपुग्ने अवस्था रहेको बताउनुभयो ।
प्रशिक्षणको क्रममा उहाँहरूले किसानका समस्या समाधानका लागि किसान वर्गसङ्घर्ष अगाडि बढाउनुपर्ने आवश्यकतामा जोड दिनुभयो ।
अप्फाका जिल्ला अध्यक्ष हेमराज कँडेलको सञ्चालनमा अघि बढेको उहाँ नै अध्यक्ष रहनुभएको नौ पूर्ण र तीन सल्लाहकारसहितको जिल्ला समिति चयन गरेको छ ।
समितिको सचिवमा बालकृष्ण आचार्य, कोषाध्यक्षमा नारायण आचार्य, सदस्यमा तिलप्रसाद पौडेल, टिकाराम सापकोटा, कुलप्रसाद आचार्य, हेम केसी र सूर्यप्रसाद लम्साल रहनुभएको छ । सदस्यको एक स्थान हाललाई रिक्त राखिएको छ ।
भेलाले मणि पौडेल, शेरबहादुर कार्की र रमेश भट्टराईलाई सल्लाहकारमा चयन गरेको छ ।
