काठमाडौं । नेपाल प्रहरीको महानिरीक्षक (आईजीपी) मा शैलेश थापा क्षेत्री नियुक्त हुनुभएको छ । मंगलबार बसेको मन्त्रिपरिषदको बैठकले एआईजी थापालाई आईजीपी नियुक्त गरेको हो ।
बरियतामा पहिलो नम्बरमा रहेका थापालाई बिहीबारबाट लागू हुनेगरी आईजीपी नियुक्त गरेको हो । बर्तमान आईजीपी ठाकुर ज्ञवाली बुधबार अनिवार्य अवकाश पाउँदै हुनुहुन्छ ।
सरकारले विगतका दुई आईजीपी जस्तै यसपटक पनि आईजीपी नियुक्ती गर्दा विवाद नआउने गरी वरियताका आधारमा थापालई नियुक्त गरेको हो । यसअघि ठाकुर ज्ञवाली र त्यसअघि सर्वेन्द्र खनाल पनि पहिलो नम्बरमै थिए । महानिरीक्षक थापाले २०७९ वैशाख १९ गतेसम्मका लागि प्रहरीको नेतृत्व गर्नुहुनेछ ।
यसैबीच आईजीपीका अर्का प्रतिष्पर्धी हरि पालले आईजीपी नियुक्त भएकोमा थापालाई बधाई दिनुभएको छ । आईजीमा थापा नियुक्त भएपछि पालले उहाँलाई सहयोग गर्ने प्रतिक्रिया दिनुभएको छ ।
‘मेरो मिल्ने साथी हो, आईजी भयो। मेरो आपत्ति रहने कुरै छैन,’ पालले सञ्चारकर्मीसँग माग गर्नुभएको छ । दुई एआईजीले आईजी हुनका लागि दुवैले स्वभाविक प्रतिस्पर्धा गर्ने तर एक जना भइसकेपछि एकले अर्कालाई सहयोग गर्ने सहमती गरेका थिए ।
