चन्द्रा श्रीस, काठमाडौँ ।
दोस्रो अन्तर्राष्ट्रिय महिला गोष्ठी समापन भएको छ । २०८२ मङ्सिर ११ गते सुरु भएको सो गोष्ठी मङ्सिर १३ गते शनिबार बुढानीलकण्ठमा सम्पन्न भएको हो ।
पहिलो दिन उद्घाटन कार्यक्रम सम्पन्न भएलगत्तै प्रत्येक दिन पाँच/पाँचओटा कार्यपत्र प्रस्तुत भएका थिए । नेपाल, जर्मनी, हल्यान्ड, टर्की, फ्रान्स, पेरू, सिरियालगायतका प्रतिनिधिले कार्यपत्र प्रस्तुत गरेका थिए ।
प्रत्येक कार्यपत्रमाथि हाउसबाट सुझाव सङ्कलन गरेर त्यसलाई समेट्ने गरी कार्यपत्रलाई अन्तिम रूप दिने निर्णय भएको आयोजक विश्व महिला सम्मेलनले जनाएको छ ।
अन्तिम दिन गोष्ठीको घोषणापत्र प्रस्तुत भएको थियो । कार्यक्रम आयोजकमध्येको एक सङ्गठन अखिल नेपाल महिला सङ्घकी अध्यक्ष मीना पुनका अनुसार हाउसमा उठेका सुझावलाई समेट्ने गरी छिट्टै सो घोषणापत्र जारी गरिने भएको छ । त्यसका लागि केही दिनमै महिला कोअर्डिनेटरको बैठक बस्दैछ ।
अध्यक्ष पुनका अनुसार घोषणापत्रमा नेपालका प्रतिनिधिले जलवायु परिवर्तनले हिउँ पग्लने क्रम तीव्र भएको, फलस्वरूप हिमाली आदिवासी जनजातिको जनजीवन कष्टकर भएको, कृषिप्रधान देश भएर पनि साम्राज्यवादी हस्तक्षेपका कारण माटोको प्राकृतिक रसायन समाप्त हुँदा उर्वराशक्ति घट्दै गएको तथा मल, बिउमाथिको परम्परागत स्वामित्व समाप्त भएको, महिलाका समस्या वर्गीय भएकाले समाजवाद नै अन्तिम विकल्प रहेको, सिङ्गापुरका सुरक्षाकर्मीमा भर्ना भएका परिवारलाई पतिको मृत्युपछि त्यहाँ बस्न नदिइएकोमा विरोध, गोर्खा भर्ती केन्द्र बन्द गरिनुपर्नेलगायतका माग राखेको थियो ।
कार्यक्रममा विश्वभरिका चार महादेश नेपालबाट दुई सयभन्दा बढी र विदेशबाट एक सय पचासभन्दा बढी प्रतिनिधिको सहभागिता रहेको आयोजकले जानकारी दिएको छ ।
सम्मेलनको पहिलो दिन साँझ गाजामा इजरायली नरसंहारको विरुद्ध साङ्गीतिक विरोध प्रदर्शन गरिएको थियो । त्यस्तै, अन्य दिन पनि सहभागी देशका प्रतिनिधिले फरक फरक भाषामा महिलामुक्तिका गीतसङ्गीत प्रस्तुत गरेका थिए ।
