दाङ । पूर्वसांसद गङ्गा थारू आफ्नै गाउँमा कुटिएकी छन् । थारूले आफूमाथि माओवादीले कुटपिट गरेको आरोप लगाएकी छिन् ।
२०८२ मङ्सिर १२ गते शुक्रबार बाटोसम्बन्धी विवादको क्रममा उनीमाथि उनकै गाउँले महिलाहरूले कुटपिट गरेको बताइएको हो ।
राप्ती गाउँपालिका–७ मा छलफलको क्रममा थारूले एक महिलामाथि जाइलागेपछि पूर्व सांसद थारूमाथि अन्य महिलाले लछारपछार गर्दै कुटपिट गरेको बताइएको छ ।
आफूमाथि कुटपिट तथा हातपात गर्नेहरूलाई कानुनी कारबाहीको माग गर्दै मुद्दा दर्ता गर्ने चेतावनी चौधरीले दिएकी छन् ।
सांसद बन्नकै लागि कहिले थरुहट पार्टी त कहिले एमाले पार्टीमा पुग्ने उनी अहिले राजावादी आन्दोलनमा सक्रिय छिन् ।
थारूले भनिन्– ‘माओवादी कार्यकर्ताले कुटेका हुन् । मैले चिनेको छु सबैलाई । बाटोमा समस्या समाधान गर्न गएकी थिएँ । घुँडामा चोट लागेको छ । मङ्गलसुत्र लुटेर लगेका छन् । प्रहरीमा जाहेरी दिएकी सिसहनियामा अस्थायी प्रहरीचौकीमा उजुरी दिएकी छु ।’
प्रहरीचौकी सिसहनियामा वरिष्ठ असई रकमबहादुर खड्काले जग्गाको सिमाना विवादमा गङ्गा र छिमेकीबिच विवाद भएको र हात हालाहाल भएको घटनामा दुवै पक्षबाट ठाडो निवेदन आएको जनाए ।
