काठमाडौं । संघीय समाजवादी पार्टीले सांसद सरिता गिरीलाई पार्टीको साधारण सदस्यसमेत नरहने गरी कारबाही गरेको छ । पार्टीको मंगलबार बसेको बैठकले गिरीलाई पार्टी सदस्यसहित सांसद पदबाटसमेत हटाउने निर्णय गरेको छ ।
नेपालले लिम्पियाधुरा सहितको नयाँ नक्सा सार्वजनिक गरेपछि त्यसको विरोध गर्दै आएकी गिरीले निशान छापमा संविधान संशोधन विरुद्ध संशोधन हालेकी थिइन् । सो संशोधन प्रस्ताव फिर्ता लिन पार्टीले दिएको आदेश उनले अटेर गरेकी थिइन् ।
सोहि विषयमा अध्ययन गरी प्रतिवेदन पेश गर्न पार्टी महासचिव रामसहाय प्रसाद यादवको संयोजकत्वमा मोहम्मद इस्तियाक राई र सुशीला श्रेष्ठ सदस्य रहेको तीन सदस्यीय कार्यदल बनाइएको थियो । सोही कार्यदलले गिरीलाई कारबाहीको सिफारिसका लागि पार्टी केन्द्रीय पदाधिकारीलाई सिफारिस गरेको हो ।
पार्टीका केन्द्रीय सदस्य विश्वदिप पाण्डेका अनुसार ‘नेपालको संविधान दोस्रो संशोधन विधेयकको सम्बन्धमा सरिता गिरीको अभिव्यक्तिबारे समाजवादी पार्टीको सो निर्णय संसदलाई जानकारी दिइनेछ ।’
पार्टीको समानुपातिक कोटाबाट निर्वाचित सांसद गिरीलाई हटाउने निर्णय संसदलाई जानकारी दिएपछि उनलाई औपचारिक रुपमा सांसद पदबाट हटाइनेछ ।
