काठमाडौँ । नेकपा (मसाल) का महामन्त्री मोहनविक्रम सिंहले तात्कालिक राजनीतिक परिस्थितिमा संविधान पुनर्लेखनको माग गलत भएको बताउनुभएको छ ।
राष्ट्रिय जनमोर्चा केन्द्रीय कार्यालयले २०८२ मङ्सिर ६ गते शनिबार हार्दिक होटलमा आयोजित अन्तरक्रिया कार्यक्रममा उठेका प्रश्नको उत्तर दिँदै उहाँले अभिव्यक्ति दिनुभएको हो ।
कार्यक्रमको पूर्वाद्र्धमा महामन्त्री सिंहले “नेपालको तात्कालिक राजनीतिक परिस्थिति र जेनजी आन्दोलन” शीर्षकमा अवधारणापत्र प्रस्तुत गर्नुभएको थियो ।
महामन्त्री सिंह उक्त अवधारणापत्रमाथि आधारित रहँदै विभिन्न राजनीतिक दल, बुद्धिजीवी तथा पत्रकारले उठाएका प्रश्नको उत्तर दिँदै हुनुहुन्थ्यो ।
‘सैद्धान्तिक हिसाबले हामी संविधान पुनर्लेखनको पक्षमा छौँ’ उहाँले भन्नुभयो– ‘गत कालमा नेपालमा पटक पटक संविधानको पुनर्लेखन हुँदै आएको छ र नयाँ जनवादी वा समाजवादी व्यवस्थामा पनि संविधानको पुनर्लेखन हुनेछ ।’
अहिलेको संविधानले जनताका आधारभूत समस्यामा समाधान गर्न नसक्ने बताउँदै उहाँले यसको पुनर्लेखन आवश्यक रहेको सैद्धान्तिक आवश्यकता आफूले स्वीकार गर्ने बताउनुभयो ।
‘तर यतिखेर यो संविधानको पुनर्लेखनको माग कसले गरिरहेका छन्’ उहाँले भन्नुभयो– ‘संविधान पुनर्लेखनको माग राजवादीले गरिरहेका छन्, भारतले गरिरहेको छ किनकि उसले यो संविधानलाई मान्यता दिएको छैन । त्यस्तै क्षेत्रीयतावादी, जातिवादीले गरिरहेका छन् ।’
२०६२–६३ सालको जनआन्दोलनले निरङ्कुश राजतन्त्रको अन्त गरी संविधानसभाले यो संविधान बनाएको बताउँदै उहाँले तात्कालिक राजनीतिक परिस्थितिमा यसको रक्षा गर्नुपर्ने बताउनुभयो ।
तत्कालै नयाँ जनवादी वा समाजवादी संविधान बनाउने अवस्था नरहेको स्पष्ट पार्दै उहाँले अगाडि भन्नुभयो– ‘नयाँ जनवाद वा समाजवादी संविधान तत्कालै बन्ने सम्भावना नरहेको अवस्थामा यो संविधानको रक्षा गरिनुपर्दछ ।’
कुनै पनि कोणबाट वर्तमान संविधान खारेज गरेर पुनर्लेखन गर्ने विचारले देशलाई पश्चगमनतर्फ लैजाने उहाँको धारणा थियो ।
वर्तमान संविधानको रक्षा हुन सके मात्रै लोकतन्त्र, गणतन्त्र र धर्मनिरपेक्षताको रक्षा हुने अवधारणा पनि उहाँले राख्नुभयो ।
