काठमाडौं । प्रतिनिधिसभा निर्वाचन प्रयोजनका लागि नेपाली कङ्ग्रेस र नेकपा (एमाले) बाहेक ३७ दल दर्ता भएका छन् ।
निर्वाचन आयोगले प्रतिनिधिसभा निर्वाचन प्रयोजनका लागि हालसम्म ३७ ओटा दल दर्ता भएको जानकारी दिएको हो ।
निर्वाचन प्रयोजनका लागि दल दर्ता गर्ने पार्टीमध्ये राष्ट्रिय जनमोर्चा चौबिसौँ क्रममा दर्ता भएको छ ।
त्यस्तै, आयोगमा नेपाल मजदुर किसान पार्टी (नेमकिपा), राष्ट्रिय स्वतन्त्र पार्टी (रास्वपा), आम जनता पार्टी, जनता समाजवादी पार्टी (जसपा) नेपाललगायतका पार्टी दर्ता भइसकेका छन् ।
निर्वाचन आयोगका प्रवक्ता नारायणप्रसाद भट्टराईले आयोगमा हालसम्म दर्ता भएका दलको सङ्ख्या भने एक सय २६ रहेको जानकारी दिए । त्यसमध्ये ३७ दलले प्रतिनिधिसभा चुनाव लड्ने गरी दल दर्ता गरेका हुन् । बाँकी ३० ओटा दल दताप्रक्रियामा रहेका छन् ।
यही मङ्सिर १० गतेसम्म प्रतिनिधिसभा सदस्यको निर्वाचन प्रयोजनका लागि दलदर्ता गर्नुपर्ने समय तय भएको छ ।
त्यस्तै आयोगले फागुन २० गतेसम्म १८ वर्ष उमेर पूरा हुने मितिलाई निर्दिष्ट समय कायम गर्ने जानकारी दिए । आगामी फागुन २० गतेसम्म १८ वर्ष उमेर पूरा हुने मतदाताको विवरण यही मङ्सिर २० गते आयोगको वेबसाइटमा प्रकाशन गर्ने र त्यसमाथि कुनै त्रुटि वा उजुरी भएमा मङ्सिर २१ देखि २७ गते सच्चाउन सकिनेछ । विवरण सच्याउने काम सकिएपछि आगामी पुस १५ गते मतदाताको अन्तिम नामावली सार्वजनिक हुनेछ ।
