काठमाडौँ । अखिल नेपाल कानुन व्यवसायी सङ्घका अध्यक्ष अधिवक्ता रोकाले चुनाव दुईधारे तरबार भएको स्पष्ट पार्नुभएको छ ।
नेकपा (मसाल) ३ नम्बर उपत्यका ब्युरोद्वारा २०८२ कात्तिक २९ गते शनिबार आयोजित कार्यक्रममा मन्तव्य राख्दै उहाँले सो धारणा व्यक्त गर्नुभएको हो ।
‘चुनाव सोचेभन्दा धेरै गम्भीर विषय हो’ उहाँले भन्नुभयो– ‘त्यससँगै चुनाव दुईधारे तरबार पनि हो ।’
आगामी फागुन २१ गते चुनाव घोषणा गरिएको सन्दर्भमा उहाँले हालको अवस्थासम्म प्रतिनिधिसभाको पुन:स्थापना हुने सम्भावना कमै रहेकाले चुनाव हुने नै बलियो सम्भावना रहेको धारणा राख्नुभयो ।
‘यो रुटिन विषय हो, यो आउँछ–जान्छ भनेजस्तो चुनाव सजिलो विषय होइन, यो धेरै नै गम्भीर विषय हो’ उहाँले भन्नुभयो ।
चुनावकै कारणले देश अग्रगतितर्फ जाने वा पश्चगामी दिशातर्फ जाने किटान हुने पनि उहाँको भनाइ थियो ।
‘संसद्वादी पार्टीले चुनावलाई रणनीतिक रूपमा लिन्छन् तर कम्युनिस्टले क्रान्तिकारी उपयोग गर्छन्’ अधिवक्ता रोकाले भन्नुभयो– ‘कम्युनिस्ट पार्टीले सही प्रकारले उपयोग गर्न सके वर्गसङ्घर्षलाई अगाडि बढाउन सकिन्छ नत्र स्वयम् कम्युनिस्ट पार्टीको जनाधार समाप्त हुन्छ ।’
चुनावपछि प्रतिद्वन्द्वी राजनीतिक शक्तिको सरकार बन्ने भएकाले ऊद्वारा शासित हुनुपर्ने अवस्था हुने उहाँको भनाइ थियो ।
यतिखेरसम्म परिस्थिति स्पष्ट नभए पनि चुनाव हुन्छ नै भनेर क्रान्तिकारी कम्युनिस्ट पार्टीले त्यसको तयारी गर्नुपर्नेमा उहाँले जोड दिनुभयो ।
‘चुनावपूर्व, चुनावको अवधिमा र चुनावपश्चात् गरी चुनावका तीन चरण हुन्छ’ उहाँले भन्नुभयो– ‘अहिले हामी चुनावपूर्वको तयारीप्रति गम्भीर हुनुपर्दछ ।’
उहाँले चुनावको पूर्वतयारीको रूपमा यतिखेर मतदाता नामावलीमा नामदर्ता र अहिलेदेखि नै सम्पर्क सम्बन्धमा जोड दिनुपर्नेमा उहाँले जोड दिनुभयो ।
प्रतिक्रियावादी शक्तिले क्रान्तिकारी शक्तिलाई चुनावमा पराजित गराएर शक्तिहीन बनाउने रणनीति अपनाउने गरेको विचार पनि उहाँले व्यक्त गर्नुभयो
