काठमाडौँ । लिपुलेक अतिक्रमणको विरुद्धमा राष्ट्रिय जनमोर्चा कञ्चनपुरले आगामी भदौ २६ गते प्रधानमन्त्रीलाई ज्ञापनपत्र बुझाउने भएको छ ।
२०८२ भदौ २० गते शुक्रबार महासचिव मनोज भट्टको प्रमुख आतिथ्यमा बसेको जिल्ला समितिको बैठकले सो निर्णय गरेको हो ।
बैठकपछि जिल्ला अध्यक्ष रामबहादुर कार्कीले जारी गरिएको प्रेसविज्ञप्तिमा आगामी भदौ २९ गतेदेखि असोज ५ गतेसम्म पालिकास्तरका विरोधसभा तथा प्रशिक्षण कार्यक्रमको मिति ठेगान गरिएको उल्लेख छ ।
अन्य साङ्गठनिक निर्णयसमेत गरिएको प्रेसविज्ञप्तिको पूर्ण पाठ यस्तो छ :
“राष्ट्रिय जनमोर्चा जिल्ला समिति कञ्चनपुरको उपलब्ध सदस्यसहित सचिवालयको बैठक पार्टीका महासचिव का. मनोज भट्टको प्रमुख आतिथ्य तथा जिल्ला अध्यक्ष का. रामबहादुर कार्कीको अध्यक्षतामा आजै सम्पन्न भएको छ । बैठकले गरेका कतिपय महत्त्वपूर्ण निर्णय सार्वजनिक गर्न यो वक्तव्य जारी गरिएको छ ।
(१) जिल्लामा भर्खरै आएको बाढीबाट प्रभावितलाई उचित व्यवस्थापन गर्न सरकारसँग आग्रह गर्ने ठेगान भएको छ ।
(२) भारत र चीनले नेपालसित कुनै सरसल्लाह नगरेर लिपुलेकको नेपाली भूभागलाई द्विदेशीय व्यापारिक नाका बनाउने सम्झौताको विरुद्ध यही भदौ २६ गते प्रमुख जिल्ला अधिकारीमार्फत नेपाल सरकारलाई ज्ञापनपत्र बुझाउने ठेगान गरिएको छ ।
(३) “गणतन्त्र र राष्ट्रियताको रक्षा एवम् सङ्घीयताको खारेजी तथा बढ्दो भ्रष्टाचारको अन्त गरौँ” भन्ने नारासहित निम्न मितिमा स्थानीयस्तरको विरोधसभा तथा प्रशिक्षण ठेगान गरिएको छ । जसअनुसार भदौ २९ गते बेलौरी नगरपालिकामा, भदौ ३० गते शुक्लाफाँटा नगरपालिकामा, भदौ ३१ गते भीमदत्त नगरपालिका र बेदकोट नगरपालिकामा, असोज २ गते दोधाराचाँदनी नगरपालिकामा, असोज ३ गते बेल्डाँडी नगरपालिकामा र असोज ५ गते लालझाडी नगरपािलकामा कार्यक्रम निश्चित गरिएका छन् ।
(४) सङ्गठनलाई जनतामाझ पुऱ्याउन कतिपय अन्य निर्णयसमेत गरिएका छन् ।”
