काठमाडौं । नेपाल कम्युनिष्ट पार्टी (मसाल) ले संविधानमा निशान छाप सम्बन्धी संशोधनमा मधेशवादी संगठनहरुले समर्थन गरेकोमा धन्यवाद दिएको छ ।
संविधानमा संशोधन देखाएको दृढतालाई निरन्तरता दिएमा त्यो सम्पूर्ण देशको र उनीहरुको पनि हितमा हुने मसालले विश्वास लिएको छ ।
महामन्त्री मोहन विक्रम सिंहले मंगलबार एक वक्तव्य प्रकाशित गरी पार्टी निर्देशन उल्लंघन गर्ने सरिता गिरिमाथि कारबाहीको प्रतिवद्धता जनाएकोमा पनि स्वागत गर्दै राष्ट्रियताप्रतिको प्रतिवद्धतालाई मधेशवादी संगठनहरुले निरन्तरता दिने मसालले अपेक्षा गरेको स्पष्ट पार्नुभएको छ ।
यस्तो छ वक्तव्यः
‘संविधानमा निशान छाप सम्बन्धी संशोधनमा मधेशवादी संगठनहरुले पनि समर्थन गरेकोमा हामीले उनीहरुलाई धन्यवाद दिन्छौँ ।
उनीहरुले अहिले संविधानमा संशोधन सम्बन्धी जुन दृढता देखाएका छन्, देशको राष्ट्रियता, सार्वभौमिकता र अखण्डता समेतबारे त्यही प्रकारको दृढतालाई निरन्तरता दिएमा त्यो सम्पूर्ण देशको र उनीहरुको पनि हितमा हुनेछ भन्ने हाम्रो विश्वास छ ।
निशान छाप सम्बन्धी सरकारको प्रस्तावलाई खारेज गराउन संशोधन प्रस्ताव राखेको तथा निशान छाप सम्बन्धी समर्थन गर्ने आफ्नो पार्टीको निर्देशन उलंघन गरी त्यसका पक्षमा मतदान नगरेको समेत कारणले समाजवादी पार्टीले आफ्नो पार्टीकी सांसद सरिता गिरीलाई कारवाही गर्ने निर्णय गरेको कार्यलाई पनि हामीले स्वागत गर्दछौँ ।
त्यसप्रकारको निर्णयले उनीहरुको राष्ट्रियताप्रतिको प्रतिवद्धतालाई नै बताउँछ । हामीले आशा गर्दछौँ, उनीहरुले भविष्यमा पनि राष्ट्रियताप्रतिको त्यसप्रकारको प्रतिवद्धतालाई निरन्तरता दिनेछन् ।’
