बुटवल । राष्ट्रिय जनमोर्चा प्रदेश ५ का सांसद तारा जिसीले नागरिकको जीवनरक्षा गर्ने जिम्मेवारीबाट सरकार भाग्न खोजेको भन्दै आपत्ति जनाउनुभएको छ ।
आइतबार प्रदेश ५ को बैठकमा बोल्दै सांसद जिसीले कोरोना संक्रमणले महामारीको रुप लिइरहेका बेला सरकाराले परीक्षणसमेत नगरेर जिम्मेवारीबाट पन्छिन खोजेको आरोप लगाउनुभयो ।
बैठकको सून्य समयमा बोल्दै सांसद जिसीले प्रदेशले आफ्नो सबै श्रोत र साधन लगाएर भएपनि जनताको जीवनरक्षा राज्यले नै गर्नुपर्ने माग गर्नुभयो । उहाँले पीसीआर परीक्षणको रिपोर्ट छिटो छरितो र अझै ब्यापक गराउन सम्बन्धित निकायको ध्यानकर्षण समेत गराउनुभयो ।
फरक प्रशंगमा सांसद जिसीले संविधान संसोधन गरी दशकौंदेखि अतिक्रमित भूमि नेपालको नक्सा र निशानछापमा सर्वसम्मत रुपले सामेल गरिएकोमा सरकार र सहभागी सबै राजनैतिक दल एवं लामो समय देखि संघर्षरत नेपाली राष्टप्रेमी जनतालाई आफ्नो पार्टीको तर्फबाट धन्यवाद प्रकट गर्नुभयो।
जिसीले मुलुकमा डरलाग्दो गरी भ्रष्टाचार मौलाएकोमा चिन्तासमेत जाहेर गर्नुभयो । भ्रष्टाचार, विकृति र सरकारको लाचारीले सिमित मात्रामा भएको लोकतन्त्र पनि खतरामा पर्ने उहाँले औँल्याउनुभयो ।
