काठमाडौँ । प्रधानमन्त्री एवं नेकपा एमालेका अध्यक्ष केपी ओलीले मदन भण्डारी फाउण्डेशन ठगी खाने भाँडो बनेको बताएका छन् । पार्र्टीकै नाममा खोलिएका प्रतिष्ठानलाई केही व्यक्तिले ठगी खाने भाँडो बनाएको आरोप लगाए ।
मदन भण्डारी फाउन्डेसनप्रति लक्षित गर्दै ओलीले पार्टीको नाममा बनाइएको संस्थालाई पारिवारिक संस्था बनाएको टिप्पणी गरेका हुन् । २०२५ साउन २६ गते मदन–आश्रित स्मृति प्रतिष्ठानको कार्यक्रमलाई सम्बोधन गर्दै उनले भने, ‘पार्टीकै नाममा एउटा माक्र्सवादी अध्ययन कक्षा कि माक्र्सवादी–लेनिनवादी अध्ययन कक्ष, कम्युनिस्ट पाठशाला के भनेर बनाएको छ । यही भक्तपुरको कहाँनेर राखेको छ। त्यत्तिकै व्यक्तिगत बनाएको छ ।’
पदमा बसिरहेर संस्थालाई नै माध्यम बनाएर त्यहाँ काम गर्नेहरूलाई आफ्ना समर्थकको रूपमा देखाएर संस्थालाई आफ्नो नियन्त्रणमा राखिरहेको ओली बताए । मदन भण्डारी फाउन्डेसनका नेतृत्वकर्ताहरूले विकृतिपूर्ण लेखहरू प्रकाशित गरेर स्मृति दिवस मनाउन र श्रद्धाञ्जली सभा गर्न नपाइने स्थिति बनाएपछि मदन–आश्रित स्मृति प्रतिष्ठान बनाएको ओलीको भनाइ थियो ।
मदन–आश्रित स्मृति प्रतिष्ठान पार्टी र आन्दोलनप्रति निष्ठाका साथ जन्मेको दाबी गर्दै उनले भने, ‘यति हो– मदन भण्डारीका विचारसँग असहमत रहेर पाखण्डी व्यवहार देखाउनेहरूको ग्रिपमा नगएको मात्रै हो।’
मदन भण्डारी फाउण्डेशनका पदाधिकारी र चक्रपथ अनलाइनको प्रस्तुति हेर्दा उक्त फाउण्डेशनको भविष्य अन्योलमा रहेको ओलीले चेतावनी दिए । ‘अब त्यसको आगामी दिनमा कसरी जान्छ भन्ने कुरा हेर्नुपर्ने अवस्था बनेको छ । त्यसका पदाधिकारीहरूका अभिव्यक्ति, चक्रपथ भन्ने अनलाइनको प्रस्तुति आदि हेर्दा कसरी जाने भन्ने कुरा अन्योलमा छ,’ उनले भने ।
