काठमाडौं । सरकारले बिहीबारदेखि लकडाउन खुकुलो बनाउने निर्णय गरेको छ । बुधबार बसेको मन्त्रिपरिषद बैठकले कोरोना भाइरसको संक्रमणका कारण करिब तीन महिनादेखि जारी लकडाउनलाई खुकुलो बनाउने निर्णय गरेको हो ।
मन्त्रिपरिषद् स्रोतका अनुसार अब मोटरसाइकल र निजी कारहरु सञ्चालन गर्न पाइनेछ । तर, मोटरसाइकलमा एक जनामात्र र कारमा चालकबाहेक दुईजना यात्रा गर्नेगरी चलाउन पाइनेछ ।
यसतै, असार १ गतेदेखि सरकारी कार्यालयहरु सञ्चालन गरिने छ। तर, शहर प्रवेश गर्ने नाकामा थप कडाई गर्ने निर्णय मन्त्रिपरिषदले गरेको छ ।
त्यसैगरी सुरक्षाका मापदण्ड अपनाएर पसल खोल्न दिने र कोरोनाको अवस्था सामान्य भएका ठाउँमा जोरबिजोर प्रणालीमा गाडी चल्न दिने निर्णयसमेत मन्त्रिपरिषद् बैठकले गरेको छ ।
एसईई परीक्षा नहुने
सरकारले यस वर्ष एसईई परीक्षासमेत नलिने निर्णय गरेको छ । कोरोना भाइरस (कोभिड–१९) महामारीका कारण स्थगित माध्यामिक शिक्षा परीक्षा (एसईई) नगर्ने र विद्यालयको आन्तरिक मूल्यांकनको आधारलाई नै मान्यता दिने निर्णय गरेको स्रोतले बतायो ।
विद्यालयद्वारा गरिएको आन्तिरक मूल्यांकनलाई आधार मान्ने र विद्यालयद्वारा गरिने आन्तरिक मूल्यांकन सम्बन्धी कार्यको स्थानीय तहले सत्यापन तथा प्रमाणीकरण गरी राष्ट्रिय परीक्षा बोर्ड समक्ष सिफारिस गर्ने र सो कार्यको अनुगमन प्रदेश सरकारको सामाजिक विकास मन्त्रालयले गर्ने निर्णय मन्त्रिपरिषदले गरेको छ ।
त्यसरी प्राप्त विवरणका आधारमा राष्ट्रिय परीक्षा बोर्डले परीक्षा फल तयार गर्ने, प्रकाशन गर्ने, प्रमाणिकरण गर्ने र प्रमाणपत्र जारी गर्नेछ ।
