जोर्डन, इजिप्ट, जर्मनी, संयुक्त अरब इमिरेट्स (युएई), फ्रान्स र स्पेनले अगस्ट १ मा गाजा क्षेत्रमा संयुक्त रूपमा मानवीय राहत सामग्री खसालेका छन्। जोर्डनको जराकस्थित सैनिक हवाइ अड्डाबाट सुरु गरिएको अभियानअन्तर्गत गाजामा करिब ५७ टन अत्यावश्यक सामग्री पठाइएको हो।
जोर्डनको सेनाले जारी गरेको विज्ञप्तिअनुसार, राहत सामग्रीमा खाद्यान्न, शिशुहरूका लागि दूध (फर्मुला) र अन्य अत्यावश्यक सामग्री समावेश छन्। यी सामग्रीहरू जोर्डन, जर्मनी, युएई, फ्रान्स र स्पेनका हवाइ जहाजमार्फत गाजामा खसालिएका हुन्। पछिल्लो साता फेरि सुरु गरिएको राहत कार्यअन्तर्गत हालसम्म जम्मा १४८ टनभन्दा बढी सामग्री गाजामा पुर्याइएको सेनाले जनाएको छ।
इजरायली सेनाले पनि यस अभियानमा समन्वय गरेको छ। सेनाका अनुसार, यसपटक पहिलोपटक जर्मनी, फ्रान्स र स्पेन सहभागी भएका छन्। यसअघि इजरायल, जोर्डन, इजिप्ट र युएईबीच मात्र सहकार्य हुँदै आएको थियो। इजरायली सेनाले गाजामा भोकमरी जानाजान गराइएको भन्ने आरोप अस्वीकार गर्दै अन्तर्राष्ट्रिय समुदायसँग मिलेर राहत पुर्याउने काम जारी राख्ने बताएको छ।
तर अर्कोतर्फ, प्यालेस्टिनी सरकारी समाचार संस्था वाफाका अनुसार, सोही दिन इजरायली फौजको आक्रमणमा २४ जना प्यालेस्टिनी नागरिकको ज्यान गएको छ। तीमध्ये ५ जना राहत खोज्न गएका बेला मारिएको बताइएको छ ।
राहत सामग्री खसाल्ने कार्यले गाजावासीलाई केही राहत दिएको भए पनि, लगातार भइरहेको हिंसा र नागरिक हताहतीले संकट अझै गहिरिएको देखिन्छ।
