वासिङ्टन । यसै सन्दर्भमा ट्रम्पले भारतमाथि पनि कडा आर्थिक कदम चालेका छन् । उनले अगस्ट १ देखि भारतीय निर्यात वस्तुहरूमा २५ प्रतिशत भन्सार महसुल लगाउने घोषणा गरेका छन् ।

भारतले रूससँग तेल र अन्य सामरिक वस्तुहरू खरिद गरिरहेको भन्दै ट्रम्पले त्यसलाई अमेरिका–भारत सम्बन्धमा विश्वासघातको रूपमा व्याख्या गरेका छन् । उनले भारत र रूसलाई “मृत अर्थतन्त्रहरू” भनी कटाक्ष पनि गरेका छन् ।

अमेरिकी राष्ट्रपति डोनाल्ड ट्रम्पले भारतसँगको व्यापारिक सम्बन्धबारे विवादास्पद टिप्पणी गर्दै पाकिस्तानसँगको ऊर्जा साझेदारीको घोषणा गरेका छन् । उनले भने, “ए दिन पाकिस्तानले भारतलाई तेल बेच्नेछ,” जसले दक्षिण एसियाली भू–राजनीतिमा व्यापक चासो उत्पन्न गराएको छ ।

ट्रम्प प्रशासनले पाकिस्तानसँगको नयाँ व्यापार सम्झौतामार्फत तेल भण्डारणको खोज र विकासमा सहकार्य गर्ने प्रतिबद्धता जनाएको छ । उक्त सम्झौता अन्तर्गत पाकिस्तानले अमेरिकी लगानीका साथ आफ्‌ना सम्भावित कच्चा तेल स्रोतहरूको अन्वेषण गर्ने बताइएको छ । ट्रम्पका अनुसार, “यो पाकिस्तानको भविष्यको ऊर्जा सुरक्षा मात्र होइन, दक्षिण एशियाको ऊर्जा आपूर्ति समीकरण नै परिवर्तन गर्ने सम्झौता हो।”

बङ्गलादेशलाई २० प्रशत लगाउँदा खुशियाली

त्यस्तै वासिङ्टनसँगको अन्तिम वार्तापछि बङ्गलादेशले संयुक्त राज्य अमेरिकासँगको व्यापार वार्ताको नतिजालाई स्वागत गरेको छ । आफ्‌ना मुख्य कपडा क्षेत्रका प्रतिस्पर्धीहरूसँगको तुलनामा बङ्लादेशले अमेरिकामा यसको निर्यातमा २० प्रतिशत कर दर सुरक्षित गरेको छ ।

बङ्गलादेश सरकारका मुख्य सल्लाहकारले जारी गरेको प्रेस विज्ञप्तिअनुसार तयारी पोसाक निर्यातमा देशको सापेक्षिक प्रतिस्पर्धात्मकता अप्रभावित रहेको छ ।

“हामीले हाम्रा प्रतिबद्धताहरू हाम्रो राष्ट्रिय हित र क्षमतासँग मेल खाने कुरा सुनिश्चित गर्न सावधानीपूर्वक वार्ता गर्‍यौँ”, बङ्गलादेशका राष्ट्रिय सुरक्षा सल्लाहकार तथा मुख्य वार्ताकार खलिलुर रहमानले भन्नुभयो, “हाम्रो कपडा उद्योगको संरक्षण शीर्ष प्राथमिकता थियो, तर हामीले अमेरिकी कृषि उत्पादनहरूमा हाम्रो खरिद प्रतिबद्धताहरूलाई पनि केन्द्रित गर्‍यौँ, यसले हाम्रो खाद्य सुरक्षा लक्ष्यहरूलाई समर्थन गर्छ र अमेरिकी कृषि राज्यहरूसँग सदभावना बढाउँछ ।”

विज्ञप्ति अनुसार बङ्गलादेश सम्भावित ३५ प्रतिशत पारस्परिक भन्सार शुल्कबाट बच्न सफल भएको छ । “त्यो हाम्रो कपडा क्षेत्र र यसमा निर्भर लाखौँ मानिसका लागि राम्रो समाचार हो । हामीले आफ्‌नो विश्वव्यापी प्रतिस्पर्धात्मकता पनि संरक्षित गरेका छौँ र विश्वको सबैभन्दा ठूलो उपभोक्ता बजारमा पहुँच गर्ने नयाँ अवसरहरू खोलेका छौँ”, रहमानले भन्नुभयो ।

अमेरिकी राष्ट्रपति डोनाल्ड ट्रम्पले द्विपक्षीय व्यापार सम्झौतालाई अन्तिम रूप दिन अगस्ट १ को समयसीमा अघि ७० देशबाट आयातमा ४१ प्रतिशतसम्म नयाँ आयात भन्सार शुल्क लगाउने घोषणा गर्नुभएको छ ।

ट्रम्पको व्यापक कार्यकारी आदेश आर्थिक सुधार, व्यापार सन्तुलन र राष्ट्रिय सुरक्षा सहयोगका प्रतिबद्धताहरूसित व्यापार पहुँचलाई जोड्ने व्यापक अमेरिकी रणनीतिको एक हिस्सा हो । प्रेस विज्ञप्ति अनुसार व्यापारिक घाटा कम गर्न मद्दत गर्न देशहरूले अमेरिकी सामानहरू खरिद गर्ने स्पष्ट प्रतिबद्धता गर्न आवश्यक थियो ।

संलग्न मुद्दाहरूको दायरालाई ध्यानमा राख्दै वार्ता प्रक्रिया जटिल र समय खपत भएको छ । भन्सार शुल्क राहत अमेरिकी निर्यातमा भन्सार शुल्कमा कटौती मात्र नभई गैर–शुल्क अवरोधहरू, व्यापार असन्तुलन र सुरक्षा मामिलाहरूमा अमेरिकी चिन्ताहरूलाई सम्बोधन गर्ने देशको इच्छासँग जोडिएको थियो ।

विज्ञप्तिमा उजागर गरिएको राष्ट्रपति ट्रम्पको कार्यकारी आदेशले प्रत्येक देशको भन्सार शुल्क दरले यी सबै क्षेत्रमा यसको प्रतिबद्धताको गहिराइलाई प्रतिबिम्बित गर्नेछ भनी स्पष्ट पारेको छ ।