काठमाडौँ । नुवाकोट, रसुवा, सुनसरी, डोल्पा र कैलाली जिल्ला पूर्णखोप सुनिश्चितताको दिगोपना घोषणा भएसँगै देशभरिका सबै ७७ जिल्ला पूर्णखोप सुनिश्चितता तथा दिगोपना घोषणा भएका छन्।
नेपालमा पूर्णखोप सुनिश्चितता तथा दिगोपना घोषणा गर्ने कार्य करिब दुई दशक अघिदेखि सुरु गरिएको भए पनि एकै आर्थिक वर्षमा सबै जिल्ला पूर्णखोप सुनिश्चितता तथा दिगोपना घोषणा भएको यो पहिलो अवसर हो ।
‘पूर्णखोप सुनिश्चितता तथा दिगोपना घोषणा हुनुले स्वास्थ्यकर्मी एवम् महिला सामुदायिक स्वास्थ्य स्वयम्सेविकाको समर्पण, स्थानीय जनप्रतिनिधिको नेतृत्व एवम् अपनत्व, अभिभावकको विश्वास र समुदायको सहकार्यलाई दर्शाउँछ’ परिवार कल्याण महाशाखाका प्रमुख डा विवेक लालले बताए ।
हरेक वर्ष घरदैलो कार्यक्रम गरी खोज र खोप अभियानअन्तर्गत दुई वर्षमुनिका बालबालिकाले १५ महिनाको उमेरभित्र लगाउनुपर्ने सबै खोपको पूर्णमात्रा पाए/नपाएको पहिचान गरिन्छ र खोप लगाउन छुट भएका ती बालबालिकालाई सबै खोपको पूर्ण मात्रा पाएको सुनिश्चित गर्दै पूर्ण खोप सुनिश्चितता तथा दिगोपना घोषणा गरिन्छ ।
‘पूर्णखोप सुनिश्चतता तथा दिगोपना घोषणा केवल घोषणा मात्र होइन, बालबालिकाको स्वास्थ्य सुरक्षाका लागि गरिएको एउटा महत्त्वपूर्ण कदम हो’ बाल स्वास्थ्य तथा खोप सेवा शाखाका प्रमुख डा अभियान गौतमले भने– ॅयो एउटा सफलताको उत्सव पनि हो ।’
प्रदेश घोषणाका हिसाबले मधेस प्रदेशले पूर्णखोप सुनिश्चितता तथा दिगोपना घोषणा गरेको छ भने अन्य प्रदेशले घोषणाको तयारी थालेको छ ।
यो सफलता प्राप्त गर्नमा गाभी, युनिसेफ, विश्व स्वास्थ्य सङ्गठन, वाटर एडलगायतका साझेदार संस्थाको सहयोग रहेकोसमेत गौतमले बताए ।
