काठमाडौँ । राष्ट्रिय जनमोर्चाका अध्यक्ष तथा प्रतिनिधिसभाका सांसद चित्रबहादुर केसीले छाउपडी प्रथाका विरुद्ध जनचेतना जगाउन प्रौढ स्कुल खोल्नुपर्ने बताउनुभएको छ ।
२०८२ असार ३१ गते मङ्गलबार प्रतिनिधिसभामा विशेष समय लिएर बोल्दै उहाँले सो धारणा व्यक्त गर्नुभएको हो ।
कञ्चनपुरको कृष्णपुर नगरपालिकामा कमला आउजी परियारको छाउगोठमा बस्दा सर्पले टोकेर निधन भएको सन्दर्भमा उहाँले सो आवश्यकतामा जोड दिनुभयो ।
‘सरकारले त्यहाँ छाउगोठ भत्काउन आदेश दिएको छ’ उहाँले भन्नुभयो– ‘युगौँयुगदेखि जनताको मनमस्तिष्कमा बसेको गलत संस्कार हटाउन प्रौढ स्कुल खोल्नुपर्दछ ।’
छाउगोठ भत्काउनु नै समस्याको समाधान नभएको बताउँदै उहाँले अछाममा यस्तै छाउगोठ भत्काउँदा महिलाहरू ओडारमा गएर बसेको घटना स्मरण गर्नुभयो ।
अध्यक्ष केसीले विद्यालयमा विदेश पठाउने शिक्षा पढाउनुको साटो छाउपडीजस्ता प्रथाको विरुद्ध चेतना जगाउने शिक्षा दिन आग्र्रह गर्नुभयो ।
उहाँले भन्नुभयो– ‘ठट्टाको कुरा होइन, छाउपडी प्रथाका विरुद्ध शैक्षिक अभियान चलाउनुपऱ्यो ।’
सम्झौताअनुसार पानी पाउनुपऱ्यो
मन्तव्यको क्रममा उहाँले प्रकृतिले ठगेर आकाशबाट पानी नपरेको अवस्थामा सिँचाइका लागि गण्डक सम्झौताअनुसारको पानी उपलब्ध गराउनुपर्ने माग गर्नुभयो ।
‘गण्डक सम्झौताअनुसार भारतले हामीलाई पानी दिएन’ उहाँले भन्नुभयो– ‘आफ्नै पानीमाथि अर्काको वर्चस्व हुने अनि हामीले ठुला ठुला गर्छौं ।’
खानेपानी समस्या
संसद्मा धारणा राख्ने क्रममा सांसद केसीले तराईका जनताले खानेपानी नपाएको समस्या पनि उठाउनुभयो ।
‘आजको एक्काइसौँ शताब्दीमा खानेपानी पाइनौँ भनेर जनताले संसद्मा रुवाबासी गर्नुपर्ने’ केसीले सरकारसित जबाफ माग्नुभयो– ‘यो विडम्बना कहिलेसम्म ?’
खानेपानीजस्तो आधारभूत सुविधा पुऱ्याउन नसकेकोमा सरकारको आलोचना गर्दै उहाँले भन्नुभयो– ‘जुन देशका जनताले खानेपानी खान पाउन्नन्, ठुला ठुला विकासको अर्थ के हुन्छ ?’
उहाँले तराईका जनतालाई खुवाउने पानीको तत्काल व्यवस्था गर्न माग गर्नुभयो ।
‘तराईका जनतालाई पानी त खुवाउनुपऱ्यो, अरू नसके पनि’ अध्यक्ष केसीले भन्नुभयो ।
