काठमाडौँ । स्वास्थ्य बिमा बोर्डमा करार सेवामा नाम निकालेका १८० जना मध्ये १५० जना डक्टरले नियुक्तिपत्र लिन अस्वीकार गरेका छन् ।
डक्टरहरू भन्छन्– ‘प्रत्येक कार्यदिनमा ४०० ओटा दाबीको मूल्याङ्कन वा २५–३० लाख रुपियाँको मूल्याङ्कन पूरा गर्नुपर्ने भनिएको छ । एक मिनेटमा एउटा दाबी मूल्याङ्कन पूरा गर्न सम्भव देखिँदैन ।’
यदि दिनमा उक्त सङ्ख्यामा दाबी पूरा नभएमा थपिँदै जाने प्रावधान अव्यावहारिक रहेको उनीहरूको भनाइ छ ।
बोर्डले दिनमा सात घन्टा काम गर्ने भनेको छ । सात घन्टामा ४२० मिनेट हुन्छ र लक्ष्य ४०० को दिइएको छ । यस अवधिमा लक्ष्य पूरा गर्न नसकिने बताउँदै उनीहरूले करारमा हस्ताक्षर गर्न अस्वीकार गरेका हुन् ।
बिमा बोर्डमा लामो समयदेखि दाबीको चाङ लागेको छ । त्यसलाई फरफारक गर्न १८० जना मेडिकल अफिसरका लागि आवेदन मागिएको थियो, जसअनुसार १८० जनाको नाम निस्केको थियो ।
कार्यविवरणमा रहेको यो लगायत अन्य केही प्रावधानलाई संशोधन गरिदिन स्वास्थ्य तथा जनसङ्ख्या मन्त्रालयलाई समेत पत्र लेखिएको छ ।
कार्यविवरण हेरेपछि उनीहरू झस्किएका हुन् । तीमध्ये २५र३० जना भने कार्यविवरण अनुसार काम गर्न तयार भएका छन् ।
